b d t: térrorizm dunyaning herqaysi rayonlirigha tesir körsitiwatidu

türkiye awazi radiyosi xewiri: birleshken döletler teshkilati bash katipi antonyo gutérrés b d t ning niyu york shehiridiki bash orginida chaqirilghan birleshken döletler teshkilatigha eza döletlerning térrorizmgha qarshi küresh organlirining 3-qétimliq yuqiri derijilik rehberler yighinida söz qildi.

gutérrés mundaq dédi: «térrorizm dunyaning herqaysi rayonlirigha tesir körsetmekte. derweqe, térrorizm rayonluq we döletlik bixeterlik yochuqliri, siyasiy, iqtisadiy we bixeterlik sistémilirining muqimsizliqliridin paydilanmaqta.»

namratliq, tengsizlik we ijtimaiy jehettin chetke qéqish qilmishlirining térrorizmni barghanséri ewj alduruwetkenlikini eskertken gutérrés mundaq dep körsetti: «térrorizmning iqtisadiy menbelirini pul yuyush, qanunsiz kan échish, qoral - yaragh, zeherlik chékimlik, qedimki eserler we adem etkeschiliki qatarliq jinayi heriketler teshkil qilidu.»

birleshken döletler teshkilati bash katipi antonyo gutérrés térrorizmgha qarshi küresh yighinida özining hel qilish tekliplirini töt maddiliq shekilde otturigha qoydi.

gutérrés térrorizmgha qarshi küreshning birinchi maddisi süpitide, bu tirishchanliqlarning merkizi bolghan birleshken döletler teshkilati yer shariwi térrorizmgha qarshi küresh istratégiyesi orginini mustehkemleshni telep qildi, hemde térrorizmgha xatime bérish üchün aldini élish chare – tedbirlirige ehmiyet bérish, kishilik hoquqni qoghdashni aldinqi orungha qoyush we bu nishangha yétish üchün yéterlik iqtisadiy meblegh ajritish qatarliq amillarning muhimliqini tekitlep mundaq dédi: «mushu heptining axirliri birleshken döletler teshkilati yer shariwi térrorizmgha qarshi küresh istratégiyesi heqqidiki közdin kechürüsh qararining omumiy kéngesh teripidin birdek awaz bilen maqullinishini ümid qilimen. shuni alahide tekitlep ötimenki, eza döletler térrorizmgha qarshi küreshni iqtisadiy jehettin qollash  wedisige emel qilishliri lazim.»