stolténbérg shiwétsiye we ukrainaning natogha eza bolush mesilisi toghrisida toxtaldi
shimaliy atlantik ehdi teshkilati — nato bash katipi yéns stolténbérg 11-, 12 – iyul künliri échilidighan nato bashliqlar yighinighiche shiwétsiyening natogha eza bolushining mumkinlikini, emma uninggha kapaletlik qilalmaydighanliqini éytti.
türkiye awazi radiyosi xewiri: yéns stolténbérg bélgiyening paytexti biryusséldiki nato bash ishtabida ötküzülgen natogha eza döletlerning dölet mudapie ministirliri yighinidin ilgiri muxbirlarning soallirigha jawab berdi.
u shiwétsiyening natogha eza bolushining wilnyus bashliqlar yighinigha ishqa ashidighan yaki ashmaydighanliqi toghrisidiki bir soalgha jawab bérip, türkiye, shiwétsiye we finlandiye otturisidiki daimiy birleshme méxanizmi yighinining tünügün paytext enqerede ijabiy keypiyat ichide ötküzülgenlikini, shiwétsiyening bulturqi madrid bashliqlar yighinida maqullanghan üch terep kélishimidiki wedisini orundighanliqini éytti.
«türkiyening orunluq bixeterlik endishiliri bar. natoning héchqandaq bir ittipaqdishi térrorluqning ziyinigha türkiyechilik uchrap baqmidi» dégen bash katip yéns stolténbérg sözini dawamlashturup: «shiwétsiye wilnius bashliqlar yighinighiche eza bolushi mumkin, emma men uninggha kapaletlik qilalmaymen. biz shiwétsiyening baldurraq eza bolushigha kapaletlik qilish üchün tirishiwatimiz. bu dairide, men jumhur reis rejep tayyip erdoghan körüshkenlikimdin we bu hepte daimiy méxanizm yighinining échilghanliqidin xushalmen» dégenlerni qeyt qildi.
nato bash katipi stolténbérg «USA Today» ge bergen bayanatida, ukrainani nato ezaliqigha teklip qilish mesilisini wilnyusta ötküzülidighan nato bashliqlar yighinida küntertipke kelmeydighanliqini éytti.
u ukraina üchün eng texirsiz ishning urushta ghelibe qilish ikenlikini tekitlep, kéler ay ötküzülidighan nato bashliqlar yighinida, ukrainagha bérilidighan konkrét yardemler toghrisida yéngi qararlarning chiqirilishini kütüwatqanliqini bildürdi.
