makron, sholz we duda ukraina mesilisini muzakire qildi
firansiye, gérmaniye we polsha rehberliri ukraina weziyiti hemde uning yawropa ittipaqi we natogha eza bolush mesilisini muzakire qildi.
türkiye awazi radiyosi xewiri: firansiye pirézidénti émmanuél makron, gérmaniye bash ministiri olaf sholz we polsha pirézidénti andréj duda firansiyening paytexti parizhda körüshüp, ukrainaning nöwettiki weziyiti shundaqla uning (ukrainaning) yawropa ittipaqi we shimaliy atlantik ehdi teshkilati — natogha eza bolushi mesilisini muzakire qildi.
rehberler yighindin kéyin qoshma muxbirlarni kütüwélish yighini ötküzdi؛ pirézidént makron yighindiki sözide, ukrainaning nöwettiki weziyitining özliridin kiyéwni dawamliq qollashni telep qilidighanliqini tilgha élip: «ukrainani boysundurghili bolmaydighanliqi éniq, uni hel qilishning birdinbir charisi xelqara qanungha hörmet qilishni asas qilghan tinchliqtur» dédi.
ukrainani herbiy, siyasiy we iqtisadiy qatarliq her qaysi tereplerde üzlüksiz qollashni dawamlashturushning zörürlükini eskertken makron, ukrainaning ghelibisining pütkül qitening tinchliqigha töhpe qoshidighanliqini tekitlidi.
polsha pirézidénti duda bolsa, rusiyeni ikkinchilep bashqa bir döletke tajawuz qilish we tesir dairisini kéngeytish imkaniyitidin mehrum qilish üchün, rusiye jahangirlikige xatime bérish kéreklikini otturigha qoydi.
«shübhisizki, ukraina yawropa ittipaqi we natogha qoshulidu» dégen duda, rusiye armiyesini xelqara qanunda körsitilgen ukrainagha tewe barliq yerlerdin chiqiriwétilishining ghelibe hésablinidighanliqini ilgiri sürdi.
sholz firansiye, polsha we gérmaniye otturisidiki hemkarliqning yawropa üchün intayin muhimliqini tilgha élip, üch döletning meydanining éniq ikenlikini, ularning ukrainani qetiy qollap kéliwatqanliqini, éhtiyajla bolidiken, ukrainani qollashni dawamlashturidighanliqini éytti.
gérmaniye bash ministiri sholz rusiye pirézidénti wladimir putinning pilanining meghlup bolghanliqini tonup yétish peytining kelgenlikini tilgha élip: «yüz minglarche ölük, milyonlarche yaridar we bulardinmu köp musapirni arqida qaldurghan 16 aydin kéyin, urushni axirlashturidighan peyt keldi. bu peyt eskerlerni chékindürüp, adil tinchliq ornitish toghrisida sözlishishke teyyarliq qilish peyti» dédi.
