amérikada chüshüp ketken ayropilanda milyardérning qizi we newrisiningmu barliqi bildürüldi
amérikaning paytexti washington etrapida tünügün (5-iyun) uchushqa cheklengen rayonda chüshüp ketken xususiy ayropilanda hayatidin ayrilghanlarning ichide, milyardér soda sananaetchi jon rumpélning qizi we newrisiningmu barliqi bildürüldi.
türkiye awazi radiyosi xewiri: merkiziy ishxanisi floridagha jaylashqan mélburn shirkitining xojayini rumpél nyu york waqti gézitige bergen bayanatida, shimaliy karolina ishtatidin longg island rayonidiki öyige qaytiwatqan peytte chüshüp ketken ayropilanda, qizi we ikki yashliq newrisi shundaqla bala baqquchi we shirket uchquchisining barliqi heqqide melumat berdi.
u milyardér soda sanaetchi, mélburn shirkiti qarmiqidiki <Encore Motors> shirkitige tewe réaktip ayropilanning chüshüp ketkenlikige dair hökümet dairiliridin yéterlik uchurgha érishelmigenlikini, emma ayropilanning bésim töwenlesh sewebidin chüshüp ketken bolushi mumkinlikini éytti.
fédératsiye awiyatsiye bashqurush idarisining yazma bayanatida, ténnéssi ishtatidin longg islandqa qarap yolgha chiqqan késsna tipliq ayropilanning paytexttiki uchush cheklengen rayongha kirgenlikini, andin wirjinyaning gherbiy jenub rayonidiki taghliq rayongha chüshüp ketkenlikini bildürdi.
ayropilanning chüshüp ketkenliki élan qilinip, bir nechche saettin ötkendin kéyin, saqchilar we qutquzush etritining ayropilanning qalduqliri bar yerge yétip barghanliqi, weqede héch kishining hayat qalmighanliqi élan qilinghan idi.
döletlik qatnash bixeterlik idarisining yuqiri derijilik awiyatsiye weqesini tekshürgüchisi adam gérxardt chüshüp ketken ayropilanning qalduqlirining délawar ishtatigha yötkilidighanliqini we uzun muddet tekshürülidighanliqini bildürgen idi.
