«makron firansiye - türkiye munasiwetlirini ilgiri sürüshni xalaydu»

türkiye awazi radiyosi xewiri: firansiye tashqi ishlar ministirliqining bayanatchisi anni klayir légréndré pirézidént émmanuél makronning qayta saylanghan türkiye jumhuriyiti jumhur reisi rejep tayyip erdoghangha türkche we firansuzche tebrik bayanati élan qilishining, uning firansiye bilen türkiye munasiwetlirini yaxshilash arzusining namayendisi ikenlikini éytti.

anni klayir légréndré firansiye tashqi ishlar ministirliqining heptilik muxbirlarni kütüwélish yighinida, muxbirlarning soallirigha jawab berdi.

légréndré türkiyede ötküzülgen ikkinchi basquchluq jumhur reis saylimining netijisi, bu netijining kelgüside türkiye – firansiye munasiwetlirige qandaq tesir körsitidighanliqigha dair soalgha, firansiye pirézidénti émmanuél makronning türkiyede ötküzülgen bu saylam heqqide bayanat élan qilghanliqini we jumhur reis rejep tayyip erdoghan bilen téléfonda körüshkenlikini eskertti.

u makronning yawropada qaytidin tinchliq ornitilishi, yawropa - atlantik okyan ittipaqining kélechiki, aqdéngizdiki xirislar qatarliq firansiye bilen türkiyening birlikte yéngishige tégishlik chongqur mesililerning barliqini éyqanliqini bayan qildi.

légréndré makronning erdoghanni qayta saylanghanliqi munasiwiti bilen tebrikligenlikini we firansiye -  türkiye munasiwetlirini yaxshilashni xalaydighanliqini tekitlidi.

u yene, erdoghan bilen makronning pat yéqinda yüzturane körüshüsh toghriliq birdeklik hasil qilghanliqinimu sözlirige ilawe qildi.»