sérbiye pirézidénti wujij kosowuning shimalidiki jiddiychilik toghrisida toxtaldi
wujij CNN téléwziyesining ziyaritini qobul qilip, yéqinqi künlerde bash kötürgen kosowuning shimalidiki jiddiychilik toghrisidiki soallargha jawab berdi.
türkiye awazi radiyosi xewiri: sérbiye pirézidénti aléksandir wujij shimaliy atlantik ehdi teshkilati — natoning kosowudiki eskerliri bilen bolghan munasiwetning hazirghiche nahayiti yaxshi dawamlishiwatqanliqini, buningdin kéyinmu mushu yönilishte dawamlishidighanliqigha ishinidighanliqini éytti.
kosowu sérblirini weziyetni tinchlandurup, tinchliq ornitishqa chaqirghan wujij: «sérbiye terep 2013- yili imzalanghan biryussél shertnamisidiki barliq teleplerni orundidi. kosowu bolsa, birdinbir mejburiyiti bolghan <sérb sheherlik hökümetler ittipaqi qurush» maddisini ijra qilmidi» dédi.
wujij 4- ayning 23- küni kosowuning shimalidiki sérblar zich olturaqlashqan jaylardiki yerlik saylamgha ammining qatnishish nisbitining %3 bolghanliqini tilgha élip, saylamning «inawetsiz» ikenlikini ilgiri sürdi.
amérika bilen firansiyening kosowoning shimalidiki jiddiychilik toghrisidiki bayanatliridin xushal bolghanliqini tilgha alghan wujij, sözini dawamlashturup: «biz barliq kélishimlerge hörmet qilduq, bizning bir eskirimizmu kosowugha kirmidi. bizning hazirghiche natoning kosowudiki qisimliri bilen nahayiti yaxshi we kespiy munasiwitimiz bar idi. men munasiwitimizning buningdin kéyinmu mushu yönilishte dawamlishidighanliqigha ishinimen» dégenlerni qeyt qildi.
23-aprél ötküzülgen yerlik saylamda kosowuning shimalidiki sérblar topliship olturaqlashqan zwéchan, zubin potok we léposawich qatarliq sheherlerde ghelibe qilghan albaniye sheher bashliqlirining wezipe öteshke bashlishi 26- may kosowu sérblirining naraziliq namayishigha duch kelgenidi.
alban sheher bashliqlirini qoghdash üchün rayongha ewetilgen kosowu saqchiliri bilen kosowu sérbliri otturisida toqunush yüz bergen, 29 – mayda sheherlik hökümet binalirini qoghdawatqan kosowu tinchliq saqlash qisimliri bilen kosowuluq sérblar otturisida sürkilish yüz bérip, tinchliq saqlash qisimlirining 30 eskiri yarilanghanidi.
