kurti kosowoning shimalidiki sürkilish toghrisida toxtaldi
kosowo bash ministiri albin kurti döletning shimalidiki jiddiy weziyetni peseytish üchün xelqaradiki shérikliri bilen bolghan alaqini kücheytkenliklirini éytti.
türkiye awazi radiyosi xewiri: bash ministir kurti ijtimaiy taratqudiki adrésida sin körünüshlük uchur hembehrilep, shimalda wezipe ötewatqan kosowo saqchiliri bilen shimaliy atlantik ehdi teshkilati — natoning kosowo tinchliq saqlash qisimliri eskerlirining namayishchi radikallar bilen tinchliqperwer sheherlik hökümet organliri otturisida chégra turghuzghanliqini bildürdi we sözini dawamlashturup: «yéqinqi saetlerde, organlirimiz xelqara shérikler bilen bolghan alaqini téximu kücheytti. chünki biz weziyetni peseytishtin ibaret ortaq meqsetke ige» dédi.
u özining yéngi sheher bashliqlirini toluq, shertsiz we üzlüksiz qollaydighanliqini tilgha élip: «démokratiyeni waqtinche toxtitip qoyghili yaki görüge éliwalghili bolmaydu. uning yolgha qoyulushi tinchliq we bixeterlikning kapaliti bolup, tehdit we xeter élip kelmeydu. kosowa jumhuriyiti gherbiy balqan rayonidiki eng démokratik dölettur» dégenlerni qeyt qildi.
bash ministir kurti shimaldiki kishilerni zorawan namayishlargha qatnishishqa righbetlendürgen bezi kishilerning barliqigha isharet qilip, namayishning hökümetke qarshi ötküzülgenlikini ilgiri sürgen halda: «qanunni ijra qilish arqiliq tertipni saqlaydighan saqchilargha, tinchliq we muqimliqni qoghdaydighan kosowo tinchliq saqlighuchi qisimlirigha we neq meydandiki weqelerni xewerleshtürgen zhurnalistlargha hujum qilidighan namayish, sheherlik hökümetlerge emes, hökümetke qarshi qilinghan namayishtur. kosowoda hakimiyetni zorawanliq we jinayi qilmishlar arqiliq emes, peqet we peqet saylam arqiliqla alghili bolidu» dédi.
23-aprél ötküzülgen yerlik saylamda kosowoning shimalidiki sérblar topliship olturaqlashqan zwéchan, zubin potok we léposawich qatarliq sheherlerde ghelibe qilghan albaniye sheher bashliqlirining wezipe öteshke bashlishi 26- may kosowa sérblirining naraziliq namayishigha duch kelgenidi.
alban sheher bashliqlirini qoghdash üchün rayongha ewetilgen kosowo saqchiliri bilen kosowo sérbliri otturisida toqunush yüz bergen, 29 – mayda sheherlik hökümet binalirini qoghdawatqan kosowo tinchliq saqlash qisimliri bilen kosowoluq sérblar otturisida sürkilish yüz bérip, tinchliq saqlash qisimlirining 30 eskiri yarilanghanidi.
