pakistan hindistanning qararigha naraziliq bildürdi

türkiye awazi radiyosi xewiri: pakistan taratqulirining xewirige qarighanda, pakistan tashqi ishlar ministiri bilawal butto zerdari azad jammu keshmir qanun chiqirish mejliside qilghan sözide, hindistanning jammu keshmirde 20 dölet guruhi yighini ötküzüshini «qanunsiz» dep atighan.

zerdari yéngi déhlining bu arqiliq ixtilapliq rayonni «qanuniy» jehettin özining qiliwélish yolida izdiniwatqanliqini eskertken hemde hindistanning 20 dölet guruhining nöwetchi reislikini süyéstimal qiliwatqanliqini ilgiri sürgen.

yene bir tereptin, pakistanning paytexti islamabad shehiride we azad jammu keshmir rayonidimu yüzlerche kishi bir yerge jem bolup, hindistanning 20 dölet guruhining bu herikitige naraziliq bildürgen.

azad jammu keshmir rayonining paytexti mozafferabad shehiride bir yerge jem bolghan namayishchilar, yéngi déhlining 20 dölet guruhining sayahet yighinini srinagar shehiride chaqirishigha naraziliq bildürgen, hemde hindistangha qarshi shoarlarni towlighan.

yéngi déhlining bu qararigha naraziliq bildürüsh üchün islamabadtimu namayish ötküzülgen.

hindistan 20 dölet guruhi sayahet xizmet guruppisi yighinini 22-24-may künliri jammu keshmir rayonining srinagar shehiride chaqiridighanliqini uqturghanidi.

engliye 1947-yili mustemlikisi bolghan hindistandin chiqip ketken mezgilde kinezlik bolghan keshmir, emdila musteqil bolghan hindistan yaki pakistandin biri bilen birlishish yolini tallashqa duch kelgen.

nopusining %90 i musulman bolghan keshmir xelqi 1947-yili pakistangha qoshulup kétish iradisini namayan qilghan bolushigha qarimay, eyni waqitniki keshmir shahzadisi hindistan bilen birlishishni qarar qilghanidi.

birleshken döletler teshkilati xewpsizlik kéngishi 1948- yilidin buyan türlük qararlarni maqullash arqiliq keshmirning «herbiysiz rayon» gha aylandurulushi we kélechikining référandum arqiliq békitilishini nishan qilmaqta.

hindistan hökümiti référandum ötküzülüshige qarshi pozitsiye tutsa, pakistan birleshken döletler teshkilati xewpsizlik kéngishi qararlirining emeliylishishini telep qilmaqta.