rusiye ikkinchi dunya urushidin qalghan qorallarni ishlitishke bashlighan
ukraina armiyesining qomandani aléksandir sirkiy baxmut aldinqi sépining bezi jaylirida rusiye qisimlirining ikki kilométirghiche chékingenlikini bildürdi.
türkiye awazi radiyosi xewiri: ukraina armiyesining qomandani aléksandir sirkiy ijtimaiy taratqu adrésida bayanat élan qilip, ukraina eskerlirining baxmut sépini mudapie qilish heriketlirining netijige érishkenlikini qeyt qildi.
u baxmut aldinqi sépide hujumgha ötkenliklirini eskertip: «düshmen bezi jaylarda ukraina eskerlirining hujumigha berdashliq bérelmey ikki kilométirghiche chékindi» dédi.
u rusiyening 9-mayghiche baxmutning kontrolluqini qolgha kirgüzüsh toghrisidiki bayanatlirining emelge ashmighanliqini eskertip: «ukraina eskerliri aldinqi sepni bixeter halda kontrol qilip, düshmenning ilgirilishige ruxset qilmidi. baxmutni talishish kürishi dawamlishiwatidu» dédi.
nato herbiy komitétining bashliqi rob bawa (Rob Bauer) rusiyening ukrainada ikkinchi dunya urushi waqtidin éship qalghan qoral-yaraghlarni ishlitishke bashlighanliqini bildürüp, ukrainaning gherbning qollishi astida süpetke diqqitini merkezleshtürgenlikini éytti.
rob bawa bélgiye paytexti biryusséldiki nato merkizide échilghan ishtab bashliqliri yighinini axirlashturup, ukraina urushining nöwettiki weziyiti toghrisida muhim bayanatlarni élan qildi.
u: «rusiyening ukrainagha qarshi urushi, yéqinqi yillarda otturigha chiqqan yawropa-atlantik bixeterlikige qaritilghan eng chong tehdit. moskwa buning üch künlük urush bolushini xiyal qilatti, emma bügün 15-éyigha qedem qoydi. eslide ruslarning kona waqti ötken qoral- yaraghlirini ishlitishke bashlighanliqini körüwatimiz. biz urush meydanlirida körüwatqan <T-54> tipliq tankilar, 1954-yili layihelinip yasalghan tankilar. bu yerdiki mesile, ularning qolida intayin köp <T-54> tankilarning bolushidur. rusiyening ukrainada urush toxtitish niyiti yoq, belki uning niyiti dölet chégrasidin halqighan» dédi.
