xitay-kanada otturisida diplomatik kirizis yüz berdi
kanada xitayning toronto konsulxanisidiki bir diplomatni «qarshi élinmaydighan adem» élan qildi.
türkiye awazi radiyosi xewiri: kanada xitayning toronto konsulxanisining bir diplomatini kanadaliq bir parlamént ezasigha tehdit salghanliqi seweblik «qarshi élinmaydighan adem» élan qildi.
kanada tashqi ishlar ministiri mélanié joli bu heqte élan qilghan bayanatida, kanadaning döletning ichki ishlirigha arilishish qilmishini qobul qilmaydighanliqini, kanadadiki diplomatlarning eger bu xil qilmishlarni sadir qilsa öz dölitige qayturulidighanliqi toghrisida agahlandurulghanliqini éytti.
ministir joli torontoda turushluq xitay diplomati saw wéyning kanadaliq bir parlamént ezasigha tehdit salghanliqi seweblik «qarshi élinmaydighan adem» élan qilinghanliqini eskertip mundaq dédi: «bu qarar barliq munasiwetlik amillar közde tutulup chiqirildi. biz démokratiyemizni qoghdashta ching turimiz.»
«yer shari we élxet» géziti aldinqi hepte élan qilghan xewiride, kanada axbarat orgini CSIS ning xitay hökümitining 2021 - yili kanada konsérwatiplar partiyesi parlamént ezasi maykél chonggha bésim ishlitish üchün, uning xongkong alahide memuriy rayonida yashaydighan uruq - tughqanlirigha tehdit sélishning yollirini izdewatqanliqi heqqide melumatqa érishkenlikini ilgiri sürgenidi.
xitay tashqi ishlar ministirliqining tor bétide élan qilinghan bayanatta, béyjingning buninggha jawaben seyshenbe küni kanadaning shangxeyde turushluq konsulxanisidiki bir diplomatni chégradin qoghlap chiqiridighanliqi bildürüldi.
bayanatta, kanada diplomati jénnifér lin lalondéning 13-mayghiche xitaydin ayrilishining telep qilinghanliqi qeyt qilindi.
