б д т: талибан һөкүмитиниң чәклимиси сәвәбидин инсанпәрвәрлик йардәмләр тохтап қалди
бирләшкән дөләтләр тәшкилати талибан һөкүмитиниң афғанистандики айал хадимларға қойған чәклимиси сәвәбидин инсанпәрвәрлик йардәм хизмитиниң үзүлүп қалғанлиқини билдүрди.
түркийә авази радийоси хәвири: бирләшкән дөләтләр тәшкилати баш катипиниң муавин байанатчиси фархан һәқ күндилик ахбарат елан қилиш йиғинида, талибан һөкүмитиниң афғанистандики айал хадимларға қойулған хизмәт чәклимиси тоғрисидики соалларға җаваб бәрди.
һәқ афғанистан хәлқиниң инсанпәрвәрлик йардәмгә интайин еһтийаҗлиқ икәнликини тәкитләп мундақ деди: «инсанпәрвәрлик йардәм мәсилисидә хирисқа дуч келиватимиз. бир тәрәптин, афғанистан хәлқиниң бу еһтийаҗлирини қандурушқа тиришиватимиз. йәнә бир тәрәптин, инсанпәрвәрлик йардәм паалийәтлиримиз бу тосалғулар сәвәбидин тохтап қеливатиду. афғанистанда әр-айал барлиқ хадимларниң ишлишигә рухсәт қилинишиниң зөрүрлүки тоғрисидики мәйданимиз өзгәрмиди.»
фархан һәқ афғанистанға тутқан позитсийәси вә сийасәтлирини давамлиқ көздин кәчүрүп туридиғанлиқлирини, һәмдә мувапиқ хизмәт усуллири үстидә издиниватқанлиқлирини қәйт қилди.
у афғанистанда әр - айал хадимларниң муһим вәзипиләрниң сиртида өйдин ишләватқанлиқини әскәртти, һәмдә дөләт ичидә инсанпәрвәрлик йардәм паалийәтлириниң давамлишиватқанлиқини байан қилди.
у йәнә, бирләшкән дөләтләр тәшкилатиниң хадимлириниң һайатиға хәвп йәткүзидиған қәдәмләрни ташлаштин давамлиқ сақлинидиғанлиқиниму сөзлиригә илавә қилди.
