shiwétsiye-norwégiye otturisida rakéta sewebidin yirikchilik yüz berdi
shiwétsiyening tetqiqat rakétalirining birining normal ishlimey norwégiye zéminigha chüshüp kétishi netijiside, ikki dölet munasiwetliride jiddiylishish yüz berdi.
türkiye awazi radiyosi xewiri: norwégiye resmiy yollar arqiliq weqeni uqturmighanliqi üchün qoshnisi shiwétsiyege naraziliq bildürdi.
norwégiye tashqi ishlar ministirliqining bayanatchisi ragnxild siménstad (Ragnhild Simenstad) bayanat élan qilip: «ministirliqqa resmiy uqturush kelmidi. chégrada mushuninggha oxshash weqe yüz bergende, mesullarning munasip yollar arqiliq norwégiye dairilirige derhal xewer qilishi nahayiti muhim. chüshken rakétaning zor ziyan peyda qilish mumkinlikini untumasliq muhim. yéqilghu bulghanghan bolushi, zeherlik maddilar bar bolushi mumkin. telep qilidighinimiz qaide-pirinsiplargha boysunush, ulargha asasen heriket qilish» dédi.
rakéta qoyup bérilgen shiwétsiye ésrangé (Esrange) alem merkizining xadimi marko koxbérg bu weqening intayin éghir ikenlikini, sewebini perez qilishqa téxi baldurluq qilidighanliqini, emma tekshürüsh axirlashqanda tepsiliy uchurlarning bérilidighanliqini éytti.
u weqe yüz bérip uzun ötmeyla dairiler bilen alaqe ornitilghanliqini, rakéta chüshüp ketkendin kéyin, kélishimler boyiche heriket qilinghanliqini bayan qildi.
shiwétsiyening shimalidiki kiruna etrapidiki ésrangé alem merkizidin düshenbe küni (24-aprél) shu yer waqti 07:20 de qoyup bérilgen we chégragha yéqin jaygha chüshüshi perez qilinghan rakéta, nishandin chiqip ketken idi.
shiwétsiye alem qatnishi shirkiti (SSC) qoyup bergen tetqiqat rakétasi 250 kilométir égizlikke yetkendin kéyin, linyesidin chetnep norwégiyening taghliq rayonigha chüshüp ketken idi.
shiwétsiye norwégiyedin epu sorap weqening tekshürülüwatqanliqini bildürgen idi.
