awstiraliye xitay üstidin sunghan erzini qayturuwaldi
awstiraliye xitayning arpa importigha qaratqan yuqiri tamozhna béjini tekshürüsh wedisige asasen, dunya soda teshkilati (WTO) gha sunghan erzini waqtinche qayturuwalghanliqini élan qildi.
türkiye awazi radiyosi xewiri: awstiraliye tashqi ishlar ministiri pénniy wong (Penny Wong) xitay üstidin dunya soda teshkilatigha sunghan erzini waqitliq qayturuwalghanliqliri toghrisida bayanat élan qildi.
u: «ishchi partiyesi hökümitining xitay bilen awstiraliye arpa mesilisidiki ixtilapni hel qilish charisi üstide izdinish toghrisida kélishim hasil qilduq» dédi.
u xitayning kelgüsi bir qanche ay ichide awstiraliye ashliqidin yuqiri tamozhna béji élish mesilisini tekshürüsh toghrisida wede bergenlikini eskertip: «awstiraliyemu bu jeryanda dunya soda teshkilatigha sunghan erzini waqitliq qayturuwalidu. eger tamozhna béji belgilengen waqit ichide emeldin qaldurulmisa, erz qayta sunulidu. xitayning bu mesilini tekshürüsh üchün teklip qilghan möhlet, dunya soda teshkilatidiki erzni hel qilish waqtidin köp qisqa» dédi.
kanbérra hökümiti dunya sehiye teshkilatigha 2020-yili munasiwetlik tunji weqeler xitayda körülüshke bashlighan wuxen wirusi (Kovid-19) ning kélip chiqishi heqqide musteqil tekshürüsh élip bérishni iltimas qilghandin kéyin, awstiraliye bilen xitayning munasiwiti nacharlishishqa bashlighan idi.
xitay buninggha qarita, awstiraliyedin gösh import qilishni toxtatqan bolup, arpa importigha %80 tamozhna béji alidighanliqini élan qilghan idi.
béyjingning import mehsulatlirigha qoyghan cheklimisimu siyasiy ixtilaplarni soda sahesige sörep kirgen idi. bu qedemler béyjing hökümitining awstiraliyeni wuxen wirusining yiltizini tekshürüsh telipini jazalashqa urunushi dep qaralghan idi.
