xitay teywen etrapida hawa we déngizdiki charlashlirini kücheytti

türkiye awazi radiyosi xewiri: teywen mudapie ministirliqi aral etrapida xitayning uchqu we herbiy paraxotlirining bayqalghanliqi toghrisida bayanat élan qildi.

bayanatta, xitayning 70 uchqusinng 35 ining teywen boghuzida tereplerning hawa we déngiz liniyisidin ötüp, teywenning «hawa mudapie perqlendürüsh rayoni» (ADIZ)  élan qilghan sahede uchqanliqi eskertildi.

aral etrapidiki uchush we paraxot charlashlirining, xitay armiyesining teywen pirézidénti sey ,yingwénning ottura amérika we amérika ziyaritidin kéyin bashlighan manéwirgha munasiwetlik ikenliki texmin qilinmaqta.

xitay 8-aprél (2023) aral etrapida quruqluq, hawa, déngiz we rakéta qisimliri qatnashqan birleshme manéwir bashlighanliqini élan qilghan idi.

xitay bilen igilik hoquq talash-tartishidiki teywenning pirézidénti sey yingwén ottura amérika döletliri bolghan giwatémala bilen bélizni ziyaret qilip qaytishida, amérikani «tranzit ötüsh» munasiwiti bilen gheyriy resmiy halda ziyaret qilghan idi.

teywen pirézidénti 30-mart niyu york shehiridiki xadson tetqiqat inistituti uyushturghan yighingha qatnashqan؛ 5-aprél kaliforniye ishtatining simi jilghisi (Simi Valley) shehiride, amérika awam palatasining reisi kéwin mékkarti (Kevin McCarthy) we her qaysi partiyelerdin teshkillengen heyet bilen körüshken idi.

béyjing mezkur ziyaret sewebidin amérikagha naraziliq bildürüp, pirézidént sey yingwénning ziyaritide wastichilik rol oynighan organ we emeldarlargha émbargo yürgüzülidighanliqini jakarlighan idi.

teywen xitay xelq jumhuriyiti qurulghan 1949-yildin tartip emeliy musteqil dölet bolup kelmekte.

xitay «bir xitay» siyasitini tekitlep, teywenning dunyadiki her qaysi döletler bilen musteqil diplomatik munasiwet ornitishigha shundqla birleshken döletler teshkilati we bashqa xelqaraliq teshkilatlarda wekil turghuzishigha qarshi chiqip kelmekte. özini  étirap qilghan döletlerge teywen bilen diplomatik munasiwetni üzüp tashlashni shert qoshup kelmekte.