amérika irangha tölem töleydu

türkiye awazi radiyosi xewiri: xelqara sot mehkimisi amérika qoshma ishtatliri irangha tölem tölishi kérek, dep höküm chiqirish bilen bir waqitta, téhran hökümitining iran merkiziy bankasining texminen 2 milyard dollarliq tonglitiip qoyulghan mal – mülüklirini qayturup bérish telipini ret qildi.

xelqara sot mehkimisi amérika qoshma ishtatliri bilen iran otturisidiki délogha alaqidar qararini élan qildi.

sot mehkimisi «amérika qoshma ishtatlirining iran hakimiyitige yürgüzgen émbargolar  1955 -yili ikki dölet otturisida imzalanghan <dostluq, iqtisadiy munasiwetler we konsulxana qanuni> kélishimige xilap, shunga amérika irangha tölem tölishi kérek», dep höküm chiqardi.

xelqara sot mehkimisi terepler 24 ay ichide tölem sommisi toghrisida ortaq tonush hasil qilalmighan teqdirde, bu mesilini qaytidin oylishidighanliqini bildürdi.

sot mehkimisi téhran hökümitining iran merkiziy bankasining texminen 2 milyard dollarliq tonglitiip qoyulghan mal – mülüklirini qayturup bérish telipini ret qildi.

xelqara edliye sot mehkimisi amérika hökümitining étirazini qobul qilip, ikki dölet otturisida imzalanghan «dostluq, iqtisadiy munasiwetler we konsulxana qanuni» kélishimi merkiziy bankalardiki mal - mülüklerni öz ichige almaydu, dep höküm chiqardi.

amérika qoshma ishtatliri 1983-yili 23-öktebir küni liwandiki amérika herbiy bazisigha qilinghan bomba hujumi jawabkarining iran ikenlikini ilgiri sürgenidi. arqidinla, amérika qoshma ishtatliri iran merkiziy bankasigha tewe iranning 2 milyard dollargha yéqin mülkini tonglitip qoyghan, we bu mal - mülüklerning mezkur hujumda hayatidin ayrilghan 241 neper amérika déngiz armiyesi eskirining  yéqin – yoruqlirigha tölem süpitide bérilidighanliqini uqturghanidi.