ispaniyediki musulmanlar 10 hesse köpeygen

türkiye awazi radiyosi xewiri: ispaniye islam komitétining katipi muhemmed ajana anadolu agéntliqigha ramizan munasiwiti bilen ispaniyediki musulmanlarning omumiy turmushi we duch kelgen mesililer heqqide melumat berdi.

u: «yéqinqi 30 yilda ispaniyediki musulmanlarning sani 10 hesse köpeydi. hökümet menbelirige qarighanda , 2 milyon 500 ming , resmiy bolmighan sanliq melumatqa qarighanda, texminen 3 milyon musulman yashaydu. bu dölettiki musulmanlarning 1 milyondin köpreki ispaniye puqrasi, ularning beziliri köchmen, yene bir qismining yiltizi yerlik ispan» dédi.

u marakesh, pakistan, bangladish, sénégal we aljiriyedin kelgen musulmanlarning köp sanni igileydighanliqini bildürüp, köpinchisining kataloniye, walénsiye, éndulus we madrid qatarliq sanaetleshken rayonlarda yashaydghanliqini eskertti.

u ramizanning ispaniyediki musulmanlar shundaqla dunyadiki barliq musulmanlar üchün alahide bir ay ikenlikini körsitip, bir qanche yil ilgiri musulmanlar eng merkezleshken séuta we mélillada yolgha qoyulghan roza héyt we qurban héytta bir kün resmiy dem élishni, qalghan rayonlarda yashaydighan musulmanlar üchünmu  yolgha qoyulushini telep qilidighanliqlirini qeyt qildi.

u musulmanlarning ijtimaiy we qanuniy hoquqlirining 1992-yili dölette imzalanghan hemkarliq kélishimi bilen kapaletke ige qilinghan bolsimu, hel qilishni kütüwatqan nurghun mesililerning barliqini tekitlidi.

u musulmanlargha öchmenlik qilish mesiliside, ispaniye weziyitining yawropadiki bashqa döletlerge sélishturghanda köp yaxshi ikenlikini eskertip: «gerche shundaq bolsimu, her waqit éhtiyatchan bolup, öchmenliktin saqlinish kérek» dédi.