baydin musulmanlarning ramizan éyini tebriklidi, uyghurlarnimu tilgha aldi
amérika qoshma ishtatliri pirézidénti jo baydin dunyaning herqaysi jayliridiki pütkül musulmanlarning ramizan éyini tebriklidi.
türkiye awazi radiyosi xewiri: pirézidént baydin ramizan éyi munasiwiti bilen mexsus yazma bayanat élan qildi.
baydin bayanatida, amérika qoshma ishtatliri we dunyaning herqaysi jayliridiki barliq musulmanlarning ramizan éyini tebriklep mundaq dédi: «bu muqeddes tepekkur mezgilide, amérika qoshma ishtatliri bolush süpitimiz bilen japa-musheqqet we weyranchiliqqa duch kéliwatqan musulman xelqlerni qollaydighanliqimizni yene bir qétim tekitleymiz. biz yéqinda yüz bergen yer tewresh apitide nurghun uruq – tughqanliridin ayrilip qalghan türkiye we süriye xelqlirini, shundaqla ötken yili yazda yüz bergen kelkün apitidin kéyin dölitini qayta qurup chiqqan pakistan xelqini dawamliq qollaymiz.»
pirézidént baydin diniy étiqad erkinlikining muhimliqini tekitlep mundaq dédi: «shériklirimiz bilen birlikte, xitay xelq jumhuriyitidiki uyghurlar, birmadiki arakanliqlar we dunyaning herqaysi jayliridiki bésim, zulum we ziyankeshlikke uchrawatqan barliq musulmanlar bilen hemkarliq asasida heriket qiliwatimiz.»
u musulman amérikaliqlarning pen- téxnikadin senet, akadémiye, qanun, tibabet, soda we biyurokratiyege qeder amérikagha nahayiti zor töhpilerni qoshuwatqanliqini eskertti, bu dairide hoquqta téximu barawer, adil keng qorsaq bir millet shekillendürüsh ehdilirige choqum wapa qilidighanliqlirini tekitlidi.
pirézidént baydin amérika qoshma ishtatliri we dunyadiki barliq musulmanlargha xitab qilip, ularning mubarek ramizan éyining xatirjemlik ichide ötüshige tilekdashliq bildürdi.
amérika qoshma ishtatliri tashqi ishlar ministiri antoni blinkénmu ramizan éyi munasiwiti bilen élan qilghan bayanatida, musulmanlar dunyasidiki shériklirige chongqur hörmet bildüridighanliqlirini eskertip mundaq dédi: «hem dölitimizde hemde chet ellere pütkül insaniyet üchün diniy erkinlikni teshwiq qilishni dawamlashturuwatimiz. 1 milyard 800 milyon musulmanning mubarek ramizan éyining beriketlik ötüshini tileymiz.»
niyu york sheher bashliqi érik adamsmu ramizan éyi munasiwiti bilen élan qilghan bayanatida, ramizanning muqeddes bir ay ikenlikini eskertip, niyu yorktiki musulmanlarning ramzan éyini tebriklidi.
