taliban afghanistan miqyasida epyundin kéyin, kendir térishnimu cheklidi

türkiye awazi radiyosi xewiri: taliban rehbiri molla hibetullah axunzade bu heqte qararname élan qildi. qararnamigha asasen afghanistanning her qaysi jaylirida kendir térish we sodisini qilish cheklendi, chekleshke xilapliq qilghanla jazalinidighan we  ziraetliri yoqutilidighan boldi. cheklesh buyruqining nazaret qilinishi we ijra qilinishini taliban waqitliq hökümiti ichki ishlar ministirliqi bilen munasiwetlik organlar öz üstige aldi.

köknardin kéyin, kendir memliket miqyasida afghanistan déhqanliri eng yaqturidighan ziraetlerning biri süpitide aldinqa orunda tumaqta.  birleshken döletler teshkilatining doklatigha asaslanghanda, 2010 - yili afghanistan dunya boyiche eng köp neshe ishlepchiqarghuchi dölet bolghan idi.

ötken yili apréldimu taliban rehbiri molla hibetullah  axunzadening qarari bilen memliket miqyasida köknar térish, ispirt, xiroin, zeherlik chékimlik ​​we neshe qatarliq maddilarni ishlitish, ishlepchiqirish we sodisini qilish cheklengen bolup, xilapliq qilghan her qandaq kishining jazagha tartilidighanliqi uqturulghan idi. emma bu cheklimige qarimastin afghanistanda köknar yétishtürüsh nisbiti ashqan idi.

birleshken döletler teshkilati zeherlik chékimlik ​​we jinayi ishlar ishxanisi (UODC) teripidin 2022 - yili noyabirda élan qilinghan doklatqa asaslanghanda, taliban hakimiyet béshigha chiqqandin kéyin, 2022 - yili köknar yétishtürüsh nisbiti aldinqi yilgha sélishturghanda %32 éship, yershari epyun bilen teminlesh nisbitining %80 ni teshkil qilghan.

afghanistanda nöwettiki iqtisadiy krizis we qurghaqchiliq shundaqla déhqanchiliq mehsulatlirining paydisi azlap ketkenliki sewebidin étiz igiliri suni az telep qilidighan köknar we kendir tirishqa bekrek yüzlenmekte.