pakistan saqchiliri bilen imranxanning qollighuchiliri otturisida toqunush chiqti

türkiye awazi radiyosi xewiri: özi eyiblengen sotqa qatnashmasliq sewebidin tutush buyruqi chiqirilghan sabiq bash ministir imranxanning, saqchilar teripidin tutulushigha qarshi dölet miqyasida bashlanghan namayishlar kéche boyiche dawamlashti.

lahorda yüz bergen namayishchilar bilen saqchilar otturisidiki toqunushlarda, 33 saqchi yarilandi, nurghun namayishchilar tutuldi.

pakistan adalet herikiti partiyesining rehbiri imranxan twittérda bayanat élan qilip, hökümetning heqiqiy meqsitining özini tutup öltürüsh ikenlikini ilgiri sürdi.

penjap saqchi idarisining bashliqi osman anwar imranxanning qollighuchilirini agahlandurup, zorawanliqlar dawamlashqan ehwalda qattiq tedbirlerni yolgha qoyidighanliqlirini bildürdi.

pakistan pirézidénti arif alwi imranxanning bixeterlikidin ensirewatqanliqini éytti.

pakistan taratquliridiki xewerlerde bildürülishiche, islamabad rayonluq sot mehkimisi imranxan üstidin bash ministir bolghan mezgilde, chet el dölet rehberliridin alghan hediyelerni sétish, ötken yili (2022) awghustta bir ayal sotchigha tehdit sélish qatarliq eyibleshler bilen sot achqan. her ikki qétimliq sotta, sotlashqa qatnashmighan imranxan üstidin ayrim-ayrim tutush qarari bérilgen.  

28-féwral (2023) mu imranxan üstidin chet dölet rehberliridin alghan hediyelerni sétish bilen eyiblinip échilghan sotta, tutush qarari chiqqan idi. saqchilar 5-mart imranxanni qolgha élish üchün barghanda, uning öyide yoq ikenliki élan qilinghan idi.

imranxan ayal sotchigha tehdit sélish bilen eyiblinip üstidin chiqirilghan tutush qararigha qarshi, sotqa erz sunghan. sot mehkimisi imranxanning tutush buyruqini 16-martqiche toxtitip qoyghan idi.

béluchistan  ishtatining kuweyta shehiridiki sot mehkimisimu 9-mart dölet organliri we memurlirini eyiblesh, jemiyet tertipini buzushqa urunush jinayiti bilen, imranxan üstidin tutush buyruqi chiqarghan. bu qarar imranxanning erz qilishi bilen yuqiri sot teripidin ikki hepte kéchiktürülgen idi.