shi jinping üchinchi nöwet dölet reislikige saylandi
xitayda üchinchi qétim reislikke saylanghan shi jinping, xitayning tereqqiyat süritini saqlap qélish üchün dunya xewpsizlikide téximu aktip rol oynaydighanliqini bildürdi.
türkiye awazi radiyosi xewiri: shi hakimiyettiki üchinchi nöwiti bashlanghan memliketlik xelq qurultiyining yépilish murasimida, xitayning «milliy oyghinishi» ni emelge ashurush üchün tereqqiyat bilen bixeterlik otturisida tengpungluq ornitishi kéreklikini tekitlidi.
u: « xitayning kelgüsidiki mezgillerde köp tereplikni qoghdaydu, yer shari bixeterlik teshebbusini qollaydu, yer sharini bashqurush sistémisining islahati we qurulushigha aktip qatnishidu. bundaq qilish, dunya tinchliqigha we tereqqiyatigha ijabiy énérgiyelerni bérip, xitayning tereqqiyatini paydiliq xelqaraliq muhit bilen teminleydu» dédi.
u xitayning dölet bixeterlik sistémisi we dölet bixeterlikini qoghdash iqtidarini östürüshi kéreklikini bildürüp: «biz choqum ammiwi bixeterlik we ijtimaiy bashqurush sistémisini kücheytip, yéngi bixeterlik endizisi bilen yéngi tereqqiyat endizisini kapaletke ige qilishimiz kérek» dédi.
u dölet mudapiesini «her qaysi tereplerde» tereqqiy qildurushning muhimliqini tekitlep: «biz choqum xitay qoralliq küchlirini döletning igilik hoquqi, bixeterliki we tereqqiyat menpeetini ünümlük qoghdiyalaydighan <xitay tömür sépili> gha aylandurushimiz kérek» dédi.
u «milliy oyghinish» ni emelge ashurush üchün «yuqiri süpetlik tereqqiyat» qa ehmiyet bérish kéreklikini körsitip, bilim we téxnologiye saheside özini özi tereqqiy qildurush, özini özi qamdashning muhimliqini tekitlidi.
10-mart (2023) ötküzülgen 14-nöwetlik memliketlik xelq qurultiyi teripidin birdek qayta saylanghan shi, xitay xelq jumhuriyiti tarixida tunji qétim ikki nöwettin köp reislik wezipisini ötigen xitay rehbiri bolup qaldi.
مۇناسىۋەتلىك خەۋەرلەر
