kéngesh palatasi wuxen wirusining yiltizigha munasiwetlik uchurlarni élan qilish layihesini testiqlidi
amérika kongreside wuxen wirusi (Kovid-19) ning yiltizigha munasiwetlik istixbarat melumatlirini jemiyetke élan qilishni shert qilghan qanun layihesi qobul qilindi.
türkiye awazi radiyosi xewiri: kongrening yuqiri qaniti bolghan kéngesh palatasi, amérika dölet istixbarat diréktorining wuxen wirusining yiltizigha munasiwetlik istixbarat melumatlirini jemiyetke élan qilishini shert qilghan qanun layihesini testiqlidi.
kéngesh palatasining jumhuriyetchi ezaliridin josh xawléy (JoshHawley) we mayk brawun (Mike Braun) teripidin sunulghan qanun teklip layihesi, awaz birliki bilen qobul qilindi.
wuxen wirusining wuxen wirus inistitutidin peyda bolghanliqi mumkinlikige ishinishke bolidighan seweblerning tépilghanliqi eskertilgen layihede, wuxen wirusining yiltizigha munasiwetlik melumatlarni jemiyetke ashkarilash chaqiriq qilindi.
layihede, wuxen wirus inistitutidiki tetqiqatchilar heqqidiki melumatlarnimu élan qilish telep qilindi.
mezkur layihe 2021-yilimu kéngesh palatasida qobul qilinghan, emma awam palatasida küntertipke kelmigen idi. layihening qanungha aylinishi üchün aldi bilen kongrening yene bir qaniti bolghan awam palatasi we arqidin pirézidént jo baydin testiqlishi kérek.
«wol strét zhurnili» géziti xewer qilghan amérika énérgiye ministirliqining aqsaraygha we kongrening muhim ezalirigha sunghan mexpiy istixbarat doklatigha asaslanghanda, wuxen wirusining xitaydiki tejribixanidin tarqalghan bolush étimalining chongluqi qeyt qilinghan.
dölet xewpsizlik meslihetchisi jéyk sulliwan istixbarat organlirida bu toghrida oxshimighan qarashlarning barliqini, biraq jezmleshtürüsh üchün yéterlik melumatlarning yoqluqini bildürgen idi.
amérika fédératsiye tekshürüsh idarisi (FBI) ning diréktori krestofér rey (Christopher Wray) wuxen wirusini «xitaydiki tejribixanidin éhtiyatsizliqtin tarqalghan bolush étimali chong» dep qarawatqanliqini éytqan idi.
