amérika istixbarat organlirining wuxen wirusining menbesini tekshürüshi xitayni biaram qildi
xitay amérika fédératsiye tekshürüsh idarisi bashliqi kristofir wrayning, «kowid -19 wirusi éhtiyatsizliqtin xitayning tejribixanisidin chiqip ketken» dégen qarash üstide tekshürüsh élip bériwatqanliqini jakarlighanliqigha naraziliq bildürdi.
türkiye awazi radiyosi xewiri: xitay tashqi ishlar ministirliqi bayanatchisi maw ning béyjingda ötküzülgen qerellik muxbirlarni kütüwélish yighinida, wirusning menbesining tekshürülishini siyasiy monopulluqqa aylandurushqa xitayning qarshi turidighanliqini bildürdi.
bayanatchi maw kowid -19 yuqumi bashlanghanda, wirus tunji qétim körülgen wuxen shehiride dunya sehiye teshkilati mutexessisler heyitining tekshürüsh élip barghanliqini eskertip, heyet teyyarlighan doklatta «wirusning tejribixanidin chiqish éhtimali intayin töwen» dégen xulasige kélingenlikini tekitlidi.
maw wirusning menbesi toghrisidiki tekshürüshlerning mutexessisler teripidin élip bérilishi kéreklikini bildürüp, «ilmiy bir mesilini tekshürüsh wezipisini istixbarat organlirigha tapshurush, mesilining siyasiylashturulghanliqini éniq körsitip béridu. amérika istixbarat organlirining ilgiri yasap chiqqan hékayilirini nezerde tutqanda, ular chiqarghan yekünning ishenchlik bolishi yoq déyerlik» dédi.
maw amérikani ilim-pen we pakitlargha hörmet qilishqa shundaqla istixbarat organlirining teshebbusi astidiki menbe tekshürüsh xizmetlirige xatime bérishke chaqiriq qilip, «amérika <tejribixanidin chiqip ketken> dégen nezeriyilerni tekrarlash arqiliq xitayni qarilashta utuqqa érishelmeydu. belki özining inawitige ziyan yetküzidu». dédi.
