kosowu bilen sérbiye bir – birining musteqilliqini étirap qilishqa tirishidighan boldi

türkiye awazi radiyosi xewiri: sérbiye pirézidénti aléksandér wujij we kosowu bash ministiri albin kurti borrél bilen bélgiyening paytexti biryussélda ötküzülgen üch terep yighinida ayrim-ayrim uchrishish ötküzdi.

borrél uchrishishtin kéyin axbaratlargha bergen bayanatida, muhim ilgirileshlerning qolgha kelgenlikini bildürüp: «shuning bilen bir waqitta yene, bügün terepler maqullighan ishlarni ijra qilish üchün téximu köp xizmet qilishqa éhtiyajliqmiz» dédi.

aliy wekil borrél, «kélishim hasil qilish nahayiti muhim, birlikke kelgenni ijra qilish téximu muhim» dégenni alahide tekitlidi.

rehberler pirinsip jehettin kélishken bu pilanning yawropa ittipaqigha eza 27 dölet teripidin qobul qilinghanliqini bildürgen borrél, bu pilangha munasiwetlik teklipning séntebirde (2022) otturigha qoyulghanliqini, shuningdin kéyin qoyuq diplomatik uchrishishlarning élip bérilghanliqini éytti.

borrél kélishimning kosowu bilen sérbiye otturisida xelqlerning kimlik yaki aptomobil nomur taxtisini ishlitip erkin sayahet qilish imkaniyitige ige qilidighanliqini, shuning bilen bir waqitta, soda munasiwiti we meblegh sélishni asanlashturidighanliqini bayan qildi.

borrél her ikki terepningmu yawropa ittipaqining maslashturushi sirtida, ziddiyetning qaytidin keskinlishishini keltürüp chiqiridighan her qandaq herikettin özini qachurushqa qoshulghanliqining ijabiy tereqqiyat ikenlikini tekitlidi.

borrél rehberlerning kéler ayning otturilirida yene bir qétim uchrishish ötküzidighanliqini élan qildi.

sérbiye 2008-yili öz aldigha musteqilliqini jakarlighan kosowuni özining zémini dep qarap kelmekte.

pat-pat toqunushup kéliwatqan sérbiye bilen kosowu, yawropa ittipaqining muresse qilishi bilen 2011-yili bashlanghan bélgrad-prishtine diyalog musapisi dairiside, munasiwetlerni normallashturushqa we axirida ikki döletning bir- birini étirap qilishi üchün ortaq yol tépishqa tirishmaqta.​​​