tramp: üchinchi dunya urushi bunchiwala yéqinliship baqmighan

türkiye awazi radiyosi xewiri:  amérikaning sabiq pirézidénti donald tramp özining resmiy intérnét tor bétide 2022-yili 24-féwral bashlanghan ukraina-rusiye urushining bir yilliqi munasiwiti bilen, «pirézidént tramp ayighi chiqmas urushlarning keynidin yügürgenlerni we yer sharilishishchilarni qoghlaydu» témisida bir widéo tarqatti.

u widéoda, «üchinchi dunya urushi bunchiwala yéqinliship baqmighan» dédi we «chongqur dölet» (deep state)- dölet mudapie ministirliqi (péntagon) bilen tashqi ishlar ministirliqidiki barliq urush küshkürtküchiliri hemde yer sharilishishchilarning bu organlardin tazilinishi kéreklikini ilgiri sürdi.

u özining «urush qozghimighan birdinbir pirézidént» ikenlikini eskertip, washingtondiki biyukratlarning tewsiyelirini ret qilip, toqunushlarning chiqishini tosqanliqini qeyt qildi.

u ukrainada 2014-yili yüz bergen isyanlarni eyni waqittiki amérika hökümitining qollighanliqini eskertip: «amérika tashqi ishlar mnistirliqining siyasiy ishlar meslihetchisi wiktoriya nulandqa oxshash, ukrainani natogha qarap yéqinlashturghan kishilirimiz bar. men pirézidéntinglar bolghan bolsam, bular hergizmu bolmighan bolatti. amérika tashqi siyasitide hökümran orunda turuwatqan chirikleshken dunya tertipidin qutulush lazim» dédi.

u 2024-yili pirézidént bolghanda, bu ehwalning özgiridighanliqini tekitlep: «toghra rehberlik astida ukraina urushini 24 saet ichide axirlashturalaymiz. men amérikaning menpeetini hemmidin muhim dep bilidighan kishilerni wezipige teyinleymen» dédi.

donald tramp «Truth Social» namliq taratqu supisida, amérikada pirézidéntliqqa namzat bolghanlarning namzatliqini élan qilghandin ilgiri yaki kéyin rohiy saghlamliq jehettin tekshürüshni qobul qilishi kéreklikini tekitligen idi.

u namzatlarning jismaniy jehettin pirézidént bolushqa layiq yaki emeslikini ispatlaydighan tekshürüshnimu qobul qilishi kéreklikini ilgiri sürgen idi.