mehmut abbas ramallahta blinkén bilen körüshti

türkiye awazi radiyosi xewiri: pelestin dölet reisi mehmut abbas amérika tashqi ishlar ministiri antoni blinkén bilen körüshkendin kéyin, axbarat élan qilish yighini ötküzdi.

u: «ikki döletlik hel qilish charisigha buzghunchiliq qilish, imzalanghan kélishimlerge xilapliq qilish, ishghalni axirlashturup, turalghu rayonlirini emeldin qaldurush mesiliside xelqaraliq tirishchanliqlarning bolmasliqi, pelestinning étirap qilinmasliqi we b d t gha eza bolalmasliqigha isirailiye jawabkar» dédi.

u pelestin xelqining yolluq heq-hoquqini xelqara qanungha asasen qoghdash we pelestin xelqini qoghdash tirishchanliqlirigha tosqunluq qiliniwatqanliqini eskertip: «bu siyaset, isirailiyeni téximu köp jinayet ötküzüshke we xelqaraliq qanunlargha téximu köp xilapliq qilishqa ilhamlanduridu» dédi.

u pelestin hökümitining «zorawanliq qilmasliq» mesiliside zor tirishchanliqlarni körsetkenlikini we her daim imzalanghan kélishimlerge emel qilghanliqini tekitlep: «isirailiyening tajawuzchiliqini axirlashturush we 1967-yili belgilengen chégralar boyiche bir pelestin döliti qurush üchün siyasiy diyalogni qaytidin kapaletke ige qilishta, amérika hökümiti, hemde xelqaraliq jemiyetler bilen birlikte tirishchanliq körsitishke teyyarmiz» dédi.

isirailiye saqchilirining ötken hepte ishghal astidiki iyordan deryasining gherbiy qirghiqigha jaylashqan jenin musapirlar lagérigha bésip kirishi, rayonda jiddiychiliklerni kücheytiwetken idi.

jenin musapirlar lagérida 10 pelestinlikning öltürülüshidin kéyin, sherqiy quddustiki qanunsiz yehudiy ahaliler rayonida yette isirailiyelikning jénidin ayrilish weqesi yüz bergen idi.

2023-yili kirgendin tartip isirailiye armiyesi we yehudiy köchmenlerning oq chiqirishi netijiside, ayallar we kichik balilarnimu öz ichige alghan halda 35 pelestinlik jénidin ayrildi.