kanada ötmüshtiki kültür qirghinchiliqini étirap qilip, yerlik xelqqe tölem töleydighan boldi

türkiye awazi radiyosi xewiri: kanada kültür qirghinchiliqi élip barghanliqi sewebidin kechürüm sorap, 20 milyard dollar tölem töleshke qoshulghandin bashqa yene, bu qétim yerliklerning kültür ziyini üchün 2 milyard dollar tölem töleydighan boldi.

yawropadin kanadagha köchüsh jeryani yerlik xelqlerge nisbeten bir irqiy qirghinchiliq we assimilatsiye hékayisige aylanghan idi.

kanadada yerlik xelqning öz kültürlirini untup xiristiyanlishishi üchün chérkaw mektepliri échilghan bolup, 150 mingdin artuq ösmür aililiridin mejburiy ayrip tashlanghan we yataqta turushqa mejburlanghan idi.157 yil dawamlashqan bu zulumda resmiy sanliq melumatlargha asaslanghanda,  az dégende 6 ming kichik bala jénidin ayrilghan idi. lékin mektep hoylisidin tépilghan kolléktip qebriler we tizimgha élinmighan balilarning sani heqiqiy sanning téximu köp ikenlikini körsitip bermekte.

kanada hökümiti bu insaniy nomussizliqqa qarita 2008 - yili resmiy kechürüm sorighandin kéyin, sotqa erz sunulghan bolup, hökümet chérkaw mektepliride qaza qilghan balilar üchün 20 milyard dollar tölem töleshke qoshulghan idi.

2012 – yilimu kanada hökümitige qarshi kültür qizghinchiliqi dewasi échildi.

hökümet bu qétim 2 milyard dollar tölem töleshni qobul qildi. tölem tölinishi üchün qarar sot mehkimisi teripidin testiqlinishi lazim.

kanadadiki chérkaw mekteplirining qarangghu tarixi 2021 - yili bu mekteplerdin birining baghchisida ismi tizimlikke kirgüzülmigen 751 kichik balining kolléktip qebrisining tépilishi bilen yene bir qétim ashkarilanghan idi.

shuningdin kéyin, barliq mekteplerning baghchisida tekshürgüchi üsküniler bilen izdesh we tekshürüsh xizmiti bashlandi.

aldinqi hepte, bu mekteplerdin yene birining baghchisidinmu kolléktip qebre tépilghan bolup, bu yerge 171 kichik balining kömüwétilgenliki texmin qilinmaqta.