péruda namayishchilar saqchi ponkitigha we sot binasigha ot qoyup berdi

türkiye awazi radiyosi xewiri: péruning karabaya ishtatigha qarashliq makusani rayonining doxturi wan férnandéz namayishlarda yüz bergen her xil zorawanliqlarda ikki kishining jénidin ayrilghanliqini, bir kishining yarilanghanliqini bildürdi.

mezkur weqe yüz bergendin kéyin, namayishchilar saqchi ponkitigha we sot mehkimisining binasigha ot qoyup berdi.

makusani saqchiliri ot qoyup bérilgen saqchi ponkitidin saqchilarning tik uchar bilen ayrilishqa mejbur bolghanliqini qeyt qildi.

péruda hökümetke qarshi dawamlishiwatqan namayishlarda 11-dékabirdin (2022) buyan jénidin ayrilghanlarning sani 53 ke chiqti, yarilanghanlar sani 700 din ashti.

eskertilishiche, namayishlarda jénidin ayrilghan 53 kishidin eng az dégende 42 kishi xewpsizlik küchlirining biwaste basturushi sewebidin jénidin ayrilghan.

péru pirézidénti dina boluwarté 10-yanwar (2023) namayishchilarni yene bir qétim diyalogqa chaqirip, namayishlarning axirlishishini telep qilghan idi.

pérudiki namayishlar sabiq pirézidént pédro kastilloning 7-dékabir (2022) kongre teripidin hoquqidin élip tashlinishi bilen partlighan idi.

pédro kastillo kongre teripidin «exlaqiy jehettin yétersizlik» bilen eyiblinip, hoquqidin qaldurulghan idi. buninggha, «hoquqidin qalaymiqan paydilinish», «dölet hoquqining ishlishige tosqunluq qilish» we «asasiy qanungha xilapliq qilishqa urunush» delil qilip körsitilgen idi.

pédro kastillo kongreni tarqitiwétishni we dölette jiddiy halet hökümiti qurushni qarar qilghandin kéyin, qolgha élinghan idi. uning muawini dina bolwarté pirézidéntliqqa teyinlengen idi.

péru aliy soti pédro kastilloni 18 ayliq qamaq jazasigha höküm qilghan we buninggha qilinghan naraziliq erzini ret qilghan idi.