yawropa ittipaqi xitaydin kelgenlerdin  tekshürtüshni telep qilmaydu

türkiye awazi radiyosi xewiri: xitayda «kowid – 19» wirusi bilen yuqumlanghauchilar sanining köpiyip kétishi seweblik, amérika qoshma ishtatliri, yaponiye we hindistan qatarliq bir qisim döletlerning, xitaydin kelgenlerge «kowid – 19» yuqumi tekshürtüshini mejbur qilishidin kéyin, yawropa ittipaqi döletlirining sehiye dairiliri bir yerge jem bolup, bu mesile heqqide muzakire élip bardi.

yighinda, yawropa ittipaqi döletlirining sayahet belgilimiliri mesiliside ortaq pozitsiye tutushi üchün dawamliq muzakire élip bérishi toghruluq qarar chiqirildi.

yawropa ittipaqining sehiye organlirining biri bolghan yawropa késelliklerning aldini élish we kontrol qilish merkizi (ECDC) mu xitaydiki «kowid – 19» wirusining « Omicron BF.7» wariyantining yawropadimu tarqalghanliqini bildürdi. shundaqla, yawropada hem «kowid – 19» wirusi tarixi hem waksina emlesh paaliyetliri arqiliq immunitét küchining yuqiri ikenlikini otturigha qoydi. shunga, xitaydiki  yuqumlanghuchilar sanining köpiyip kétishining yawropagha köp tesir körsetmeydighanliqini eskertip, xitaydin kelgenlerdin «kowid – 19» yuqumi tekshürtüshini telep qilishning hajiti yoq, dep qaridi.

yawropa ittipaqi döletliridin italiye, xitaydin kelgen yoluchilardin «kowid – 19» yuqumi tekshürtüshini mejbur qilghan, yawropa ittipaqi miqyasidimu shundaq qarar chiqirilishini telep qilghanidi.

yawropada «kowid – 19» wirusi bilen yuqumlanghuchilar sanida aziyish körülüshke bashlishidin kéyin, barliq sayahet cheklimiliri bikar qilinghanidi. yawropa ittipaqi kéngishimu 13 – dékabir(2022)  küni eza döletlerge «kowid – 19» yuqumi sewebidin yolgha qoyuluwatqan sayahet cheklimilirini pütünley emeldin qaldurulushini tewsiye qilghan, hemde zörür tépilghanda «jiddiy tedbirler» ning yolgha qoyulidighanliqini bildürgenidi.