shimaliy koréye yaponiyeni agahlandurdi
shimaliy koréye yaponiyening yéngi dölet mudapie istiratégiyesige qedem qoyghanliqini eyiblep, buninggha qarshi téximu küchlük herbiy heriket qollinidighanliqi heqqide agahlandurushta boldi.
türkiye awazi radiyosi xewiri: yonxap agéntliqining xewer qilishiche, shimaliy koréye diplomatiye ministirliqi teripidin élan qilinghan bayanatta, yaponiyening bashqa döletlerge qarshi turush siyasitini qollinish arqiliq bu rayongha éghir bixeterlik tehditi élip kélidighanliqi otturigha qoyulghan. shundaqla, yaponiyening yéngi bixeterlik siyasiti arqiliq sherqiy asiyaning bixeterlik sharaitining tüptin özgergenliki, yaponiyening xata we intayin xeterlik yolni tallighanliqi, shimaliy koréyening bu istratégiyege qarshi téximu küchlük herbiy tedbir qollinidighanliqi qeyt qilinghan.
yaponiye, 16 – dékabir küni, ikkinchi dunya urushidin kéyin yolgha qoyghan bixeterlik siyasitini özgertip, düshmen bazisigha zerbe béreleydighan istratégiyege ötkenidi.
xitayning tinch okyandiki herbiy kéngeymichiliki we shimaliy koréyening yadro hem bashqurulidighan bomba pirogrammilirini öz ichige alghan rayonluq tehditler aldida, yaponiye mudapie siyasitini özgertkenidi.
yéngilanghan mudapie siyasitige asasen, xitay eng chong istratégiyelik reqib, shimaliy koréye bolsa ilgirikige qarighanda téximu chong we téximu yéqin tehdit dep qaralghanidi.
igilinishiche, yaponiye, bu istratégiyege asasen, jiddiy ehwallarda, hujumlarning aldini élish meqsitide bashqa bir döletning zéminigha biwasite hujum qilip kirish iqtidarigha ige bolidiken.
