blinkén washingtonning xitaydiki namayishlarni qollaydighanliqini bildürdi
amérika tashqi ishlar ministiri antoni blinkén washingtonning xitaydiki kowid-19 tedbirlirige qarshi namayishlarni qollaydighanliqini we özining aldimizdiki yilning béshida élip baridighan xitay ziyariti jeryanida bu mesilini otturigha qoyidighanliqini éytti.
türkiye awazi radiyosi xewiri: amérika tashqi ishlar ministiri antoni blinkén CNN qanilining jéyk tapér riyasetchilik qilghan «ittipaqdash dölet» pirogrammisigha qatniship, küntertiptiki soallargha jawab berdi.
u, tapérning «amérikaning xitaytiki kowid -19 namayishlirini qollaydighan yaki qollimaydighanliqi» toghrisidiki soaligha, «elwette qollaymiz. biz meyli xitay, meyli iran yaki dunyaning her qandaq bir yéride bolsun, kishilik hoquqni, tinch namayish qilish hoquqini, pikir bayan qilish hoquqini qoghdaymiz» dep jawab berdi.
u kéler yilining béshida özining xitayda dölet ishliri ziyaritide bolidighanliqini, ziyariti jeryanida bu mesilinimu otturigha qoyidighanliqini bildürdi.
xitay hökümiti küz peslining bashlinishi bilen wirusning omikron wariyantining köpiyip ketkenlikini ilgiri sürüp otturigha qoyghan «nöl yuqum» siyasiti dairiiside, sayahet cheklimisi, kolléktip tekshürüsh, ishlepchiqirish, soda we mulazimet sahesidiki paaliyetlerni cheklesh yaki yépiq halette dawamlashturush qatarliq qattiq we keng kölemlik tedbirlerni yolgha qoyghanidi.
xelq xitay hökümitining mezkur qattiq tedbirlirige naraziliq bildürüp, döletning oxshimighan jaylirida namayishlarni ötküzgenidi.
