tramp amérika pirézidéntliq saylimida namzat bolidighanliqini jakarlidi

türkiye awazi radiyosi xewiri: sabiq pirézidént donald tramp shu yer waqti 21.00 de filorida ishitatining palma sahilidiki mar-a -lago sariyida muxbirlarni kütüwélish yighini ötküzdi؛ sözlirini «amérikaning qaytip kélishi hazir bashlinidu» dep bashlighan tramp, özining ikki yil ilgiri wezipisini amérikani altun dewrige teyyar qilip qoyup ötküzüp bergenlikini, özi hakimiyet yürgüzgen mezgilde iqtisadning misli körülmigen derijide yaxshilanghanliqini, xitay, rusiye, iran we shimaliy koréyening tashqi siyasette amérikani, bolupmu özini hörmetleydighanliqini ilgiri sürüp: «nmen echche on yildin buyan urush bolmighan bir dewrni bashtin kechürgen tunji pirézidént. dunya tinch idi. amérika jush urup rawajlanghan, dölitimiz parlaq kelgüsige qarap yol alghanidi. chünki men amérika xelqige chong wedilerni berdim, bashqa prézidéntlargha oxshimaydighan yérim, men wedemde turdum. bizning rehberlikimizde biz ulugh we shanliq xelq iduq. bu siler uzundin buyan anglap baqmighan bir ish idi» dédi.

tramp, jo baydin rehberlikidiki amérikaning chékinishke yüzlengenlikini ilgiri sürüp: «milyonlighan amérikiliqlargha nisbeten, jo baydin dewridiki yéqinqi ikki yil azab, japa, teshwish we ümidsizlik dewri boldi. amérika kemsitildi, nomus qilduruldi, ajizlashturuldi» dédi.

«eger men pirézidént bolghan bolsam, ukraina (kirizis) hergiz yüz bermigen bolatti» dégen tiramp, baydinning tashqi siyasitini qattiq tenqid qildi.

jumhuriyetchiler partiyesining awam palatasini kontrolluqi astigha éliwalghanliqini eslitip ötken we buning peqet amérika chüshini qutquzush kürishining bashlinishi ikenlikini eskertip ötken tramp, sözini dawamlashturup: «amérikani qaytidin chong we shan-shereplik orungha érishtürüsh üchün, men bügün axsham amérika pirézidéntliqigha namzat ikenlikimni jakarlaymen» dégenlerni qeyt qildi.