stolténbérg: rusiye bilen muzakire ötküzüshni ukrainaliqlar özi qarar qilishi kérek

türkiye awazi radiyosi xewiri: nato bash katipi stolténbérg gollandiye muawin bash ministiri we tashqi ishlar ministiri wopé xoéskra (Wopke Hoekstra), dölet mudapie ministiri kajsa ollongrén (KajsaOllongren) bilen körüshkendin kéyin, axbarat élan qilish yighini ötküzdi.

u rusiyening xérsondiki mudapie sépini dnipro deryasining sol qirghiqigha chékindürüshining ukraina üchün urush meydanidiki ghelibe ikenlikini we ukrainani qollashni dawamlashturush istratégyesini küchlendürgenlikini bildürdi.

u: «köpinche urushlar üstelde axirlishidu, emma üsteldikiler pütünley urush meydanidiki ghelbilerge baghliq. ukraina armiyesi urushta ghelibe qilghanséri muzakirelerde qoli shunchilik küchlük bolidu» dédi.

u «ukraina rusiye bilen üstelde olturushi üchün yaxshi pursetke érishtimu?» dégen soalgha: «ukrainaliqlar urushta bedel tölewatidu. shunga, qachan we qandaq shertler astida muzakirelerni bashlashni ukrainaliqlar qarar qilishi kérek» dep jawab berdi.

u «ukraina rusiye bilen éhtimalliqi bolghan muzakirelerni bashlighan ehwalda natoning pozitsiyesi qandaq bolidu?» dégen soalgha bolsa: «ukraina qobul qilidighan shertler shekillense qollaymiz. bizning wezipimiz ukrainaning ghelibilirini ashurush» dep jawab berdi.

u axirida, ukrainaning qollashning dawamlishishi kéreklikini tekitlidi.