shi jinping: armiye jeng qilish iqtidarini ashurup, urushqa teyyar turushi kérek
xitay dölet reisi shi jinping xitayning künséri küchiyiwatqan muqimsizliq we éniqsizliqlargha duchar boluwatqanliqini bildürüp, armiyening «jeng qilish iqtidarini ashurup, urushqa teyyar turushi kérekliki» ni éytti.
türkiye awazi radiyosi xewiri: xitayning s s t w (CCTV) qanili, shi jinpingning tünügün (8-noyabir) xitay xelq azadliq armiyesining qomandanliq ishtabi ornidiki merkizi herbiy ishlar komitétining birleshme heriket merkizini ziyaret qilip, xitay armiyesining yéngi dewrde müshkül we éghir wezipige duch kelgenlikini tekitligendin kéyin, «barliq qoralliq küchler birdinbir we eng asasliq ölchem süpitide jeng qilish iqtidarigha ehmiyet bérishi, hemde barliq xizmetlirini urushqa teyyarliq qilish we ghelibe qilish meqsitige yétish nishanini boylap élip bérishi kérek» dégenlikini xewer qildi.
shi jinping yene, «dunyaning yéqinqi bir esirning eng téz özgirishlirini bashtin kechürüwatqanliqi» gha isharet qilip: «xitay armiyesi döletning igilik hoquqi, bixeterliki we tereqqiyat menpeetini qetiy qoghdishi, partiye we xelq tapshurghan wezipilerni orundishi kérek» dégen.
ziyaret jeryanida, herbiy forma kiyiwalghan shi jinping qomandanlar bilen körüshkende, xitay xelq azadliq armiyesi qurulghanliqining 100 – xatire yili bolghan 2027- yilghiche dunyaning aldinqi qatardiki armiyelirining birige aylandurush nishanini tilgha élip, «buni emelge ashurush üchün pütün küchimiz bilen tirishishimiz kérek» dégenlerni qeyt qilghan.
