yawropa siyasiy ortaq gewdisi yighinigha 44 döletning bashliqliri ishtirak qildi

türkiye awazi radiyosi xewiri: yawropa ittipaqi kéngishining bashliqi charléz mishél chéxiye paytexti piragada ötküzülgen yawropa siyasiy ortaq gewdisi yighinida, yawropada muqimliq, xewpsizlik, tinchliqni kapaletke ige qilish üchün özara hemkarliq we kordinatsiyeni qandaq kücheytish mesililirining muzakire qilinidighanliqini bildürdi.

u: «men intayin ümidwar, chünki yighingha teklip qilinghan 44 döletning ishtirak qilish qarari, tunji ijabiy signal» dédi.

gollandiye bash ministiri mark rutté: «24-féwraldin tartip dawamlishiwatqan urush, qitemizde tinchliq we muqimliqni sel chaghlimasliq kéreklikini ispatlap béridu. oxshash waqitta yene, démokratiyemiz we ortaq qimmet qarashlirimizning qoghdilishi kéreklikinimu körsitip béridu. bu peqet yawropa ittipaqiningla wezipisi emes. barliq yawropa döletliri kordinatsiye halida küchlük jawab bérishi kérek» dédi.

girétsiye bash ministiri kriyakos michotaks yawropa siyasiy ortaq gewdisi yighinining ortaq bixeterlik we parawanliqni kücheytish üchün, qitediki barliq döletlerni bir yerge jem qilghan yéngi munber bolghanliqini éytti.

sérbiye pirézidénti aléksandar wujij rusiyege émbargo yürgüzmigenlikliri üchün sélinghan tehditlerdin qorqmighanliqini eskertip: «piragagha yüzüm aq keldim. yawropa ittipaqi rehberlirige mesuliyetchanliq we estayidiliq bilen muwapiq jawab bérimen» dédi.

gérmaniye bash ministiri olaf sholz yawropa döletlirini bir yerge jem qilghan ötküzülgen yawropa siyasiy ortaq gewdisige «chong yéngiliq» dep baha berdi.

ukraina pirézidénti zélénskiy yighingha sinliq shekilde qatniship: «piragada ötküzülgen yawropa siyasiy ortaq gewdisi yighini yawropada tinchliqni ornitish üchün purset. rusiyege qarshi urushta choqum ghelbe qilishimiz kérek» dédi.