yawropa: seperwerlik élani, putinning urushni dawamlashturidighanliqining béshariti

türkiye awazi radiyosi xewiri: yawropa ittipaqi komitéti bayanatchiliridin biri pétér stano rusiyediki qismen seperwerlik élani we bölgünchilerning tünügün (2022-yili 20-séntebir) ukrainaning sherqidiki donétsik, luxansk we xérsonda rusiyege qoshulush référandum qarari üstide toxtaldi.

u: «seperwerlik qarari putinning weyran qilghuch urushni dawamlashturidighanliqi we téximu keskinleshtüridighanliqi toghrisda xelqara jemiyetke bergen éniq signali. bularning hemmisi putinning kirizisni hel qilishqa küch chiqirishni xalimaydighanliqini, emma kirizisni chongqurlashturushni xalaydighanliqini körsitip béridu. xelqara qanun we b d t ehdinamisige xilapliq qilindi» dédi.

u putinning öz dölitini qoghdash üchün yadro qorallirini öz ichige alghan her qandaq wasitilerni sinaydighanliqi toghrisida bergen wedisige munasiwetlik soalgha: «putin yadro qimar oynawatidu» dep jawab berdi.

u yadro qorallirini ishlitish yaki yadro eslihelirining etrapida qoral ishlitishning xeterlik ikenlikini, bundaq qiilshning rayonghila emes, belki pütkül dunyaghimu tesir körsitidighan yaman aqiwetlerni keltürüp chiqiridighanliqini tekitlep, xelqara jemiyetning bu pozitsiyeni özgertish üchün putingha téximu éghir bésim qilishi kéreklikini qeyt qildi.

yawropa ittipaqi komitétining bayanatchisi érik mamér «rusiyege yéngi émbargo yürgüzülemdu?» dégen soalgha: «bu toghrida muzakireler dawamlishiwatidu. netije chiqquche bu toghrida bir nerse déyelmeymen» dep jawab berdi.

érik mamér ukrainaning sherqide référandum ötküzülgendin kéyin, héchkimning u rayonlarni «rusiye zémini» dep qarimaydighanliqini eskertti.

ukrainaning donbas rayonidiki donétsik we luxansk hökümitining atalmish ​​xelq kéngeshliri bilen, rusiyening kontrolluqigha ötken xérsondiki atalmish ​​hökümet, tünügün (20-séntebir) 23-séntebirdin 27-séntebirgiche her ikki rayonning rusiye fédératsiyesige qétilishi üchün xelq arisida awazgha qoyulidighanliqini élan qilghan idi.

rusiye dölet mudapie ministirliqimu bügün (2022-yili 21-séntebir) etigen qismen seperwerlikni élan qilip, 300 ming zapas eskerni wezipe öteshke chaqirilidighanliqini élan qildi.