dunya sehiye teshkilati maymun chéchikini «yer shari xaraktérlik jiddiy ehwal» élan qildi

türkiye awazi radiyosi xewiri: dunya sehiye teshkilati bash diréktori, doktor tédros adanom gébréyus, 21-iyul teshkilatning shiwéytsariyening jenwe shehiridiki bash orginida ötküzülgen jiddiy ehwal komitéti yighinigha munasiwetlik uchurlarni axbaratchilar bilen ortaqliship, özlirining hazirghiche 75 dölette 16 mingdin artuq ademning maymun chéchiki wirusini yuqturwalghanliqini jezmleshtürgenliklirini, besh kishining wirustin yuqumlinip qaza qilghanliqini bildürdi.

gébréyus jiddiy ehwal komitéti yighinidiki wirusning xetirige munasiwetlik barliq pikirlerni anglighanliqini tilgha élip: «komitét maymun chéchiki yuqumining xelqara amma saghlamliqi jiddiy haliti teshkil qilidighanliqi toghrisida birlikke kélelmidi» dédi.

wirusning nurghun döletlerde tunji körülüshke bashlighanliqini bildürgen gébréyus, wirusning yéngi yuqush shekilliri bilen dunyada tarqilishni dawamlashturuwatqanliqini, uninggha dair melumatlarning cheklik ikenlikini bildürgendin kéyin, wirusning dunya miqyasidiki tarqilish nisbiti normal bolsimu, yawropada nahayiti téz tarqiliwatqanliqini eskertip: «shunga men maymun chéchiki wirusining xelqara amma saghlamliqi jiddiy haliti teshkil qilghanliqigha qarar qildim» dégenlerni qeyt qildi.