gébréyus dunya ellirini yuqumning nöwettiki yönilishige qarshi jiddiy tedbir qollinishqa chaqirdi

türkiye awazi radiyosi xewiri: dunya sehiye teshkilati bash diréktori doktor tédros adanom gébréyus, teshkilatning jenwediki bash orginida ötküzülgen muxbirlarni kütüwélish yighinida, kowid-19 yuqumining yer shari miqyasida qaytidin ewj élishi we uninggha munasiwetlik eng yéngi uchurlar heqqide toxtaldi.

yéqinqi 6 hepte ichide dunya miqyasidiki heptilik yéngi yuqumlanghuchilar sanining bir hesse köpeygenlikini tekitligen gébréyus: «gerche kowid -19 sewebidin qaza qilghanlar sanidiki éshish yuqumlinish ehwalidikidek téz bolmisimu, yenila yuqiri boluwatidu. yuqumlinishtiki éshish aldimizdiki heptilerde téximu köp bimarning balnistlargha élinishi we wapat bolghanlar sanining köpiyishini kütidighanliqimizni körsitidu» dédi.

u, yéqinqi bir nechche hepte ichidiki éshishta, yuqumning qaysi wariyantining tesirining küchlük bolghanliqining namelum ikenlikige isharet qilip: «bu éshishning sewebi biz alliburun bilidighan bir xil wariyant bolushimu yaki pütünley yéngi wariyant bolushimu mumkin» dédi.

yuqumning yéngidin otturigha chiqidighan wariyantlirining burunqilirigha qarighanda téximu küchlük bolidighanliqini tekitligen gébréyus, «barliq döletler teyyar turushi kérek. yuqumgha qarshi turush iqtidarini töwenletken döletler éghir xewpke duch kelmekte» dep agahlandurdi we sözini dawamlashturup: «doxturxanilar toshup ketmigen hazirqi sharaitta, barliq döletler wirusni közitish, immunitét küchi, emgek küchi, teminlesh we taqabil turush jehettiki yétersizliklerni toluqlishi kérek» dégenlerni qeyt qildi.

nöwettiki kowid-19 waksinilirining éghir késel we ölüm xewpige qarshi yenila ünümlük ikenlikini bayan qilghan bash diréktor, dunya sehiye teshkilatigha eza döletlerni xeter astidiki yashanghanlar we bashqa guruppilargha, bolupmu sehiye xizmetchilirige waksina emleshke chaqirdi.