général bérgér xitay bilen toqunushup qalghan teqdirde tashlinidighan qedemlerni otturigha qoydi
amérika déngiz armiyesi qomandani général dawid bérgér, toqunush yüz bergen teqdirde, xitay armiyesining qomandanliq - kontrol qilish méxanizmi we arqa sep amillirining asasliq zerbe nishani bolidighanliqini éytti.
türkiye awazi radiyosi xewiri: général dawid bérgér washingitondiki xudson institutining yighinida, amérika déngiz armiyesining yéngi jeng idiyesi we küch layihesi toghrisida toxtaldi.
arqa sep mesilisining nöwette istixbaratqa oxshashla halqiliq bir mesile ikenlikige isharet qilghan bérgér, herbiy heriket pilanlirida arqa sep amilining aldinqi qatardin orun alidighan muhim mesilige aylanghanliqini éytti.
u, arqa sep bilen birlikte, urush meydanigha munasiwetlik uchurlarningmu intayin muhim ikenlikini 24-féwraldin buyan dawam qiliwatqan rusiye-ukraina urushida nahayiti roshen körgenliklirini qeyt qildi.
bérgér, xitaygha oxshash bir dölet bilen robiroliship qalghanda amérika armiyesining berdashliq küchini ashurush üchün tashlinidighan qedemlerning némilerdin ibaret ikenliki toghrisidiki bir soalgha jawab bérip, «biz deslepte yumshaq (ajiz) nuqtilargha zerbe bérimiz. tesewwur qilghininglardek, bu hem eshya oboroti éléménti, hem qomandanliq kontrol méxanizmi bolidu» dédi.
général bérgér yene, yéqinqi 20 yildin buyan xitayningmu amérika armiyesining qomandanliq - kontrol méxanizmini qandaq ajizlashturghili bolidighanliqi üstide izdiniwatqanliqini, chünki ularningmu amérika armiyesining heriket jeryanida qomandanliq we kontrol qilish nuqtilriigha intayin ehmiyet béridighanliqini bilidighanliqini otturigha qoyup, «eger toqunush yüz bérip qalsa, ular bizning qomandanliq we kontrol qilish méxanizmimizni zerbe nishani qilidu» dédi.
