birmaning aghduruwétilgen rehbiri suchi mexpiy nazaretxanidin paytexttiki bir türmige yötkeldi
2021-yili 1 – féwral bérmada meydangha kelgen herbiy siyasiy özgirish arqiliq aghdurup tashlinip, nazaret astigha élinghan birma rehbiri ang san suchi mexpiy tutup turush merkizidin paytext népidodiki bir türmige yötkeldi.
türkiye awazi radiyosi xewiri: türme tewelikidiki bir jaygha sélinghan yéngi bir binada sotlinidighanliqi bildürülgen ang san suchining, birma armiyesi 2021 – yili 1 – féwral herbiy siyasiy özgirish qozghap qanunluq hökümetni aghduruwetkendin kéyin, deslipide paytexttiki turalghusida nazaret qilinghan bolsimu, kéyinche kem dégende bir qétim bashqa yaqqa köchürülüp, bir yil boyiche paytexttiki bir herbiy bazida mexpiy tutup turuluwatqanliqi ilgiri sürülmekte idi. u tünügün tutup turuluwatqan mexpiy jaydin népdodiki bir türmige yötkeldi.
birma herbiy dairiliri, her biri üchün 15 yilliqtin qamaq jazasi bérilishi telep qiliniwatqan 11 türlük chiriklik qilmishini sadir qilish bilen eyibliniwatqan suchini dölet mexpiyetlikige xilapliq qilish bilenmu eyiblimekte.
77 yashliq suchi hazirgha qeder qanunsiz halda simsiz alaqilishish apparati import qilip saqlash, ammiwi malimanchiliqqa qutratquluq qilish we kowid-19 cheklimilirige xilapliq qilish bilen eyiblinip alte yilliq qamaq jazasigha höküm qilindi.
melum bolushiche, siyasiy özgirish hökümitining barliq eyibleshliri qobul qilinghan teqdirde, suchining 175 yildin yuqiri muddetlik qamaq jazasigha höküm qilinishi mumkin iken.
