muhemmed eleyhissalamgha qilinghan haqaretlerge qarshi ötküzülgen namayishlarda ikki kishi qaza qildi
hindistanning charkand ölkiside hakimiyet béshidiki xelq partiyesining ikki emeldarining islam dini we muhemmed eleyhissalamgha haqaret qilishigha naraziliq bildürüp ötküzülgen namayishlarda ikki kishi qaza qildi.
türkiye awazi radiyosi xewiri: hindistan taratqulirining xewerlirige qarighanda, xelq partiyesining nupur sharma we xelq partiyesi yéngi déhli médiya ishliri mesuli nawén jindalgha naraziliq bildürüp bashlanghan namayishlar hindistan miqyasigha kéngeydi؛ mezkur emeldarlargha qarshi shoalarni towlashqan namayishchilar sharmaning qolgha élinishini telep qildi.
hindistan saqchilirining charkandning paytexti ranchidiki namayishchilarni tarqaqlashturush üchün atqan oqi bezi namayishchilargha tegdi؛ ranchi sehiye penliri instituti emeldarliri, oq we tashlar tégip yarilanghan 12 kishining doxturxanilarda balnistqa élinghanliqini uqturdi.
ranchi saqchi idarisi mudiri anshuman kumar, oq tégip yarilanghan ikki kishining hayatidin ayrilghanliqini, ranchida kochigha chiqishni cheklesh tüzümining yolgha qoyulghanliqini bildürdi.
yene bir tereptin, uttar pradésh ölkisi bash ministiri yogi adityanat yuqiri derijilik emeldarlar bilen yighin ötküzüp, «ölke miqyasida qanunsiz namayishlargha we zorawanliq weqelirige qatnashlargha qarshi eng éghir charilerni yolgha qoyush» toghrisida yolyoruq chüshürdi.
uttar pradésh saqchi idarisi, ölkining her qaysi rayonliridiki namayishlargha ishtirak qilghan 136 kishining nazaret astigha élinghanliqini uqturdi.
bu jeryanda namayishchilar, döletning nurghun sheherliride tinch usulda namayishlirini dawamlashturuwatqan bolsimu, gherbiy béngal ölkisining xowrax shehiri bilen uttar pradéshning prayagraj shehiridiki namayishlar zorawanliq weqelirige aylinip ketti.
gherbiy béngal hökümiti emeldarliri, xowraxta 13 – iyunghiche intérnét mulazimitining toxtitilghanliqini uqturghanidi.
