bash wezir boris jonson wezipisidin istépa bermeydighanliqini bildürdi

türkiye awazi radiyosi xewiri: engliye bash weziri boris jonson péshqedem meslihetchi su gray (Sue Gray) teyyarlighan wuxen wirusi (Kovid-19) sewebidin yolgha qoyulghan karantin jeryanida bash wezirlik mehkimiside ötküzülgen ziyapetlerge munasiwetlik tepsiliy doklatni élan qilghandin kéyin, muxbirlarni kütüwaldi.

u bu setchiliklerning mesuliyitini üstige alidighanliqini bildürüp: «kishilerning néme üchün ghezeplengenlikini we ularning bolghan ishlargha narazi bolghanliqini chüshinimen. biraq, qetiy halda wezipemni dawamlashturup, bergen wedilirimni emelge ashurushni wezipem dep oylaymen. doklatning netijiliri kishini qanchilik biaram qilishi we selbiy bolushi, shundaqla kishini qanchilik xéjil qilishidin qetiynezer, wezipemni dawamlashturushum, hökümetmu algha ilgirileshni dawamlashturushi kérek. mushundaq qilimiz» dédi.

engliye saqchiliri 2020-yili we 2021-yili wuxen wirusi karantin tedbirlirige xilapliq qilinghanliqi ilgiri sürülgen 12 weqege munasiwetlik xewerler otturigha chiqqandin kéyin, mushu yilning (2022) béshida tekshürüshni bashlighan idi.

tekshürüsh ramkisida, bash wezir boris jonsongha yuqirida tilgha élinghan mezgilde özining tughulghan küni ziyapitige qatnashqanliqi sewebidin jerimane qoyulghan idi.

u wuxen wirusi karantin tedbirlirige xilapliq qilghanliqi sewebidin bérilgen jerimanedin kéyin, 12-may (2022) xelqtin epu sorighan, emma wezipisidin istépa bermeydighanliqini élan qilghan idi.

péshqedem meslihetchi gray saqchilar weqe heqqide tekshürüshni bashlighandin kéyin, teyyarlighan doklatini ashkarilighan idi.

doklatta, wuxen wirusi karantin tedbirliri dawamlishiwatqan mezgilde bash wezirlik mehkimiside ktküzülgen ziyapetlerning köpinchiside tedbirlerge xilapliq qilinghanliqi eskertilgen bolup, taziliq we amanliq xadimliriningmu «qobul qilghili bolmaydighan» muamilige duchar bolghanliqi qeyt qilinghan idi.