musulmanlar roza héytni tebriklimekte

türkiye awazi radiyosi xewiri: qirghizistanda minglarche kishi roza héyt namizini jamalerde we chong sheherlerning meydanlirida oqudi. pirézidént sadir japparow, parlamént bashliqi talant mamitow, milliy xewpsizlik dölet komitéti bashliqi kamchibék tashiyéw jamaet bilen septe turdi.

ezerbeyjan paytexti bakuda ilahiyyat, tezepir we kök jameliri etigen seherdila namaz oqush üchün kelgen kishiler bilen liq toldi.

özbékstan paytexti tashkentte kishiler héyt namizi üchün jamelerge sel bolup aqti. «osman mushafi» dep bilinidighan, üstide xelipe osmanning qéni bolghan kiyik térisige yézilghan quran kerim saqliniwatqan, tashkent hezret imam külliyeside oqulghan roza héyt namizigha, özbékstan diniy ishlar idarisining bashliqi nuriddin xaliqnazarow imamliq qildi.

shimaliy qibris türk jumhuriyitining paytexti lefkoshadiki hala sultan jamesi we dölettiki barliq jamelerde roza héyt namizi oquldi.

nigériyening ikkinchi chong shehiri bolghan kanoda roza héytni tebriklep daqa-dumbaq chélindi, salyotlar étildi. sheherdiki bezi jamelerde ilahiy naxshilar oquldi.

yaponiye paytexti tokyo we etrapidiki ishtatlarda yashaydighan musulmanlar roza héyt munasiwiti bilen tokyo jameside toplandi. shibuya rayonidiki jamege we etraptiki kochilarda sepke tizilghan jamaet, wuxen wirusi (Kovid-19 ) tedbirliri astida namaz oqudi. tokyo jamesining imami muhemmed rifat chinar xutbide«xatirjemlik we qérindashliq iqlimida héytlarning islam dinidiki ehmiyiti» ni alahide tekitlidi.

malayshiyada paytext we etrapidiki ishtatlarda kishiler roza héyt munasiwiti bilen malayshiya islam uniwérstétida bir yerge jem boldi.

gérmaniyede diyanet ishliri türk islam birleshmisige qarashliq köln merkez jameside nurghun kishilerning qatnishishi bilen roza héyt namizi oquldi.

iraqning kerkük shehiride héyt namizi üchün jamelerni toshquzghan kishiler, tinchliq we xatirjemlik üchün dua qildi.

iraqning chong nur jameside roza héyt namizini ada qilghan kishiler, iraqning baldurraq térrorluq teshkilati daésh we her xil hujumlardin pütünley qutulushi, kishilerning xatirjem yashishi üchün dua qildi.

mesjidi eqsada 200 ming kishi héyt namizi oqudi. sherqiy quddusning kona sheher rayonigha tutishidighan yollar, mesjidi eqsagha qarap mangghan yashlar, er-ayallar, yashanghanlar we kichik balilar bilen tolup tashti.

shiwétsiyede fitja chong jamesining imami osman doghan namazdin burun jametke tebligh qilip, ittipaqliq we barawerlikni tekitlidi.

u musulmanlarning bir-birige yardem qilishi kéreklikini alahide eskertti. paytext stokholmning bérdéng rayonida jamaet putbol meydanida héyt namizi oqudi.

rusiyede moskwadiki merkez jamesi, anit jamesi we tarixiy jamesi etigendila jameet bilen liq toldi. moskwada 40 jayda héyt namizi üchün alahide ruxset bérildi.