papa rus ortodoks chérkawining rehbiri kiril bilen körüshüshini emeldin qaldurdi
katoliklarning ruhaniy rehbiri we watikan pirézidénti papa fransiskés rusiye ortodoks chérkawining rehbiri patrik kiril (Kirill) bilen iyun éyida (2022) quddusta pilan qilinghan körüshüshni emeldin qaldurghanliqini bildürdi.
türkiye awazi radiyosi xewiri: papa fransiskés argéntinaning la nasiyon (La Nacion) gézitining ziyaritini qobul qilghanda, patrik kiril bilen bolghan munasiwetlirining «nahayiti yaxshi» ikenlikini bildürüp: «watikanning patrik kiril bilen iyunda quddusta pilan qilinghan ikkinchi qétimliq yüz turane körüshüshni emeldin qaldurushqa mejbur bolghanliqimizdin epsuslinimen. diplomatiyemiz hazir bizning bir yerge jem bolushimizning qalaymiqanchiliq peyda qilidighanliqini chüshendi» dédi.
yene bir tereptin, 24-féwral (2022) ukrainagha qarshi urush qozghighan rusiyeni yaki rusiye pirézidénti putinni biwaste eyiblimigenliki üchün tenqidlerge duch kelgen papa, ilgiriki papalarning héchqayssining undaq qilmighanliqini qeyt qildi.
u ukrainaning paytexti kiyéwni ziyaret qilish chaqiriqliri üstide toxtilip, bundaq ziyarettin kéyin urush dawamlashsa, ehmiyiti bolmaydighanliqini eskertti.
rusiye ortodoks chérkawining tashqi munasiwetler bölümining bashliqi ilariyon (İlarion) bayanat élan qilip, patrik kiril we papa fransiskés körüshüshining kéchiktürülüshige, ukraina-rusiye urushining seweb bolghanliqini bildürdi.
u yene, kiril we papa firansiskésning qeyerde we qachan körüshidighanliqining élan qilinmighanliqini bayan qilip, özlirining yighin mezmuni we teyyarliqliri toghrisidiki xizmetlerni téxiche bashlimighanliqini éytti.
papa bilen patrik kiril birinchi qétim 2016-yili kuba paytexti hawana ayrodurumida körüshken. ikkinchi qétim 16-mart (2022) intérnétta sinliq körüshken idi.
