zélénskiy donbas urushining bashlanghanliqini bildürdi

türkiye awazi radiyosi xewiri: ukraina pirézidénti wolodimir zélénskiy élan qilghan widéo nutuqida, rusiye armiyesining donbasqa hujum bashlighanliqini, emma qanchilik rus eskiri ewetilishidin qetiynezer ukraina armiyesining rayonni we dölitini qoghdaydighanliqini tekitlidi.

u: «hazir rusiye qisimlirining uzun waqittin buyan teyyarliq qilghan donbas urushining bashlanghanliqini éytalaymiz. rusiye armiyesining köp qismi hujumgha merkezleshti. u yerge qanchilik rus eskiri ewetilishidin qetiynezer, biz urushimiz. qara déngizimizni qoghdaymiz. her küni shundaq qilimiz. ukrainaning héchqandaq sheyiysidin waz kechmeymiz» dédi.

ukraina pirézidéntliq ishxanisining bash meslihetchisi oléksiy aréstowich rusiye armiyesining ukrainaning sherqide yéngi hujum bashlap rayonni qolgha kirgüzüshke urunuwatqanliqini bildürdi.

u bir döletlik téléwiziye qanilining ziyaritini qobul qilghanda, rusiye bashlighan yéngi hujumda töt meqsetning barliqini eskertip, rusiyening bu nishanlirigha yételmeydighanliqini we hujumning 17-aprél (2022) bashlanghanliqini ilgiri sürdi.

u rusiye armiyesining asasen ukrainaning sherqidiki mudapie linyesini buzushqa tirishiwatqanliqini we birinchi wezipisining luxansk rayonidiki rubézhno-popasnaya-séwérodonétsk linyesidiki zéminlarni qolgha kirgüzüsh ikenlikini؛ bu arqiliq pütkül rayonni ukrainaning bashqa rayonliridin üzüp tashlashqa urunidighanliqini qeyt qildi.

u rusiyening ikkinchi nishanining xarkiw rayonidiki izyumdin slawyansk we kramatorskqiche bolghan rayongha hujum qilip, bu rayonlarni qolgha kirgüzüsh ikenlikini؛ rusiyening bashqa nishanlirining bolsa, zaporizhwaning gulyaypol rayoni we mariyupolni qolgha kirgüzüsh ikenlikini bildürdi.

amérika dölet mudapie ministirliqining bir yuqiri derijilik mesulimu rusiyening ukrainaning sherqidiki taktikiliq bataliyon sanini 76 ge chiqarghanliqini uqturdi.

rusiyening taktikiliq bataliyonlirida 800 din 1000 ghiche esker bolidu.