lawrow gherbning ukrainani donbas mesilisini küch ishlitip hel qilishqa qistighanliqini ilgiri sürdi

türkiye awazi radiyosi xewiri: rusiye tashqi ishlar ministiri sérgéy lawrow, gherb döletlirining ukrainani donbas mesilisini zorluq bilen hel qilishqa ittirgenlikini eskertip, «kiyéw donétsik we luxanskqa qarshi urushqa teyyarliq qiliwatatti» dédi.

sérgéy lawrow tashqi ishlar ministirliqigha qarashliq moskwa döletlik diplomatiye institutida ötküzülgen «reqemlik xelqara munasiwet — 2022» namliq yighinida söz qildi.

u, rusiye bilen ukraina otturisida 24-féwraldin buyan dawam qiliwatqan urush toghrisidiki sözi jeryanida, gherb döletlirining ukrainagha yétekchilik qiliwatqanliqigha isharet qilip: «gherb döletliri 8 yil boyiche kiyéw hakimiyitining minsik kélishimige boysunmasliq istikini qollidi, ularni donbas mesilisini zorluq bilen hel qilishqa mejburlidi. kiyéw donétsik we luxanskqa qarshi urushqa teyyarliq qiliwatatti» dédi.

lawrow gherbning normal alaqe yollirini taqashqa urunuwatqanliqini, reqemlik diplomatiyening köz qarashlarni chet eldiki közlengen nuqtigha yetküzidighan birdinbir yol ikenlikini éytti we sözini dawamlashturup: «gherb ukraina kirizisini bahane qilip bizge qarshi arilashma jeng élan qildi. bu urush uchur sahesi qatarliq her qaysi sahelerni öz ichige almaqta» dégenlerni qeyt qildi.

rusiyening özini yalghuzlashturmighanliqini eskertken lawrow: «nöwettiki kirizis her qandaq sahedikige oxshash tereqqiyat üchünmu qoshumche purset bilen teminleydu» dédi.

rusiyening intérnét bashqurush we tor bixeterliki saheside ijabiy hemkarliq ornitishni qollaydighanliqini bildürgen rus ministir, moskwaning reqemlik sahede öz bixeterlikige kapaletlik qilidighanliqini we tor supilirini tereqqiy qilduridighanliqini sözlirige ilawe qildi.