médwédéw médwédchukni esir ukrainaliqlar bilen almashturush teklipini otturigha qoydi

türkiye awazi radiyosi xewiri: ukraina pirézidénti wiladimir zélénskiy, rusiye prézidénti wiladimir putin bilen yéqinliqi bilen tonulghan we tünügün ukraina xewpsizlik küchliri teripidin qolgha élinghan asasliq öktichi partiye rehbiri wiktor médwédchukni ruslarning qolidiki esir ukrainaliqlar bilen almashturush teklipini otturigha qoydi.

zélénskiy urushning 48- künini muhakime qilghan sin körünüshlük uchurida, dölitige hujum qilghan rusiyening éghir talapetke uchrighanliqini eskertti.

ruslarning ukrainani bir nechche künde ichide ishghal qilip bolushni pilanlighanliqini, emma, ularning 48 saetlik pilanining 48 künge uzirap ketkenlikini bildürgen zéléniskiy: «rus armiyesi bu 48 künde chéchiniyediki ikki urushta, sowét ittipaqi afghanistanda 10 yilda uchrighan talapettin éghir talapetke uchridi» dédi.

zélénskiy ukraina bixeterlik idarisi (SBU) ning alahide herikiti sayisida nazaret astigha élinghan wiktor médwédchuk toghrisidimu toxtaldi.

médwédchukning 48 kün boyiche yoshurunushqa muweppeq bolghan bolsimu, emma axirida tutulghanliqini bildürgen zélénskiy: «men rusiye fédératsiyesige médwédchukni ruslar tutqun qilghan ukrainaliqlar bilen almashturushni teklip qilimen. bizning qanun ijrachilirimiz we armiyemizmu bu éhtimalliqni oyliship qoyisun» dégenlerni qeyt qildi.

ukrainaning ikkinchi chong partiyesi dep qarilidighan «turmush üchün öktichiler munbiri» rehbiri médwédchuk 2021- yili mayda döletke xiyanet qilish jinayiti bilen eyiblinip öyige nezerbend qilinghanidi.

médwédchukning urush bashlanghandin kéyin nezerbendtin qéchip ketkenliki ilgiri sürülgenidi.