rusiyening ukrainadiki qisimlirini küchlendürüwatqanliqi ilgiri sürüldi

türkiye awazi radiyosi xewiri: ukraina armiye qomandanliq ishtabi bayanat élan qilip, rusiyening ukrainadiki armiye qisimlirini küchlendürgenlikini ilgiri sürdi.

bayanatta: «rusiyede herbiy qisimlarni almashturush, qomandanliq we kontrol qilish sistémisini küchlendürüsh, herbiy qisimlarni maddiy we téxnika bilen teminleshni kapaletke ige qilish üchün qedemler tashlanmaqta» déyildi.

buning üchün rusiyening sherqiy we merkiziy herbiy rayonlridin ukrainaning chégrasigha jaylashqan bélgorod, woronézh we kursk rayonlirigha herbiy qisimlarni orunlashturghanliqi ilgiri sürülgen bayanatta: «ishghalchilar xarkiw shehirini qismen qorshawgha élishni dawamlashturuwatidu. xarkiw shehiri üchün éytqanda, urushning shiddetlinish éhtimali bar» déyildi.

yene bir tereptin, ukrainaning luxansk herbiy rayonining bashliqi sérgéy gayday rusiye armiyesining donbas rayonini pütünley qolgha kirgüzüshke urunuwatqanliqini éytti.

u kéyinki künlerde donbasta urushning shiddetlinidighanliqini bildürüp: «rayongha esker we qoral-yaraghlarning topliniwatqanliqini körüwatimiz. buninggha teyyarliniwatimiz» dédi.

u rusiye eskerlirining rubizhné shehirige hujum qilghanliqini bildürüp, xelqni agahlandurdi we mundaq dédi:

«yene bir ximiyelik hujum qilindi. rakéta atarlarning oqliri rubizhné etrapidiki natriy kislata bakigha chüshti. özenglarni qoghdashqa, yépiq jaylarda ishik we dérizelerni taqashqa diqqet qilinglar.»