ezerbeyjan-erméniye söhbetliride muhim ilgirilesh hasil qilindi

türkiye awazi radiyosi xewiri: yawropa ittipaqi kéngishi bashliqi charléz mishél bilgiye paytexti biryussélda ezerbeyjan pirézidénti ilham eliyéw we erméniye bash ministiri nikol pashinyan bilen ayrim-ayrim körüshkendin kéyin, üch terep kechlik tamaq ziyapitide birge boldi.

charléz mishél texminen besh saet dawamlashqan söhbetni axirlashturup, axbarat élan qilish yighini ötküzdi.

u rehberlerning tinchliq kélishimi tüzüsh üchün bir konkrét musapini bashlash we ortaq xizmet guruppisi qurushta pütüshkenliklirini bildürdi.

u: «hemmimiz birlikte tinchliq kélishimi imzalash meqsitide, tinchliq söhbetliri üchün bir konkrét musapini bashlashni qarar qilduq. kélishimni imzalashqa qanchilik waqit kétidu? dégen soalgha jawab bérish tes. biraq, dékabir éyidiki (2021) söhbettin buyan nurghun xizmetler ishlendi. ikki terepning némilerge ehmiyet béridighanliqini, némilerning sezgür mesililiri ikenliki muzakire qilindi. ilgirilesh hasil qiliwatimiz. her ikki tereptiki qiyinchiliqlarni yenggil oylighanliqim emes. ilgirilesh hasil qilsh üchün ortaq arzu bar. bu kéche (6-aprél) toghra yolda bir qedem tashliduq. elwette bu hemme mesilining hel bolghanliqini bildürmeydu. emma, bir yerge jem bolush üchün éhtimali bar mesililerning némiler ikenlikini téximu yaxshi chüshengenlikimizni, baldurraq tinchliqni, bixeterlikni we muqimliqini kapaletke ige qilidighan izchilliqqa ige kélishimni imzalash üchün ilgiriligenlikimizni bildüridu» dédi.

bu jeryanda, ezerbeyjan tashqi ishlar ministirliqi bayanat élan qilip, charléz mishél, ilham eliyéw we nikol pashinyan emelge ashurghan üch terep yighinida hasil qilinghan pikir birlikige, «ezerbeyjanning menpeetliri, rayonning tinchliqi we xatirjemlik ichide tereqqiy qilishini kapaletke ige qilish üchün bésilghan muhim qedem» dep baha berdi.

ministirliqning yazma bayanatida, üch terep yighinida, erebeyjan bilen erméniye otturisida tinchliq kélishimining teyyarliqlirini bashlash üchün, ikki dölet tashqi ishlar ministirliqlirigha yolyoruq chüshürüshning qarar qilinghanliqi qeyt qilindi.

bayanatta, tereplerning ezerbeyjan we erméniye otturisida chégra linyesini belgilesh  üchün 2022-yili aprélning axirighiche ortaq chégra komitéti teshkilleshte pikir birliki hasil qilinghanliqi eskertildi.

üch terep yighinida ezerbeyjan bilen erméniye otturisida tashyol we tömür yollarni échish mesilisiningmu muzakire qilinghanliqi bildürülgen bayanatta: «biryussél uchrishishi, ezerbeyjanning menpeetliri, rayonning tinchliqi we xatirjemlik ichide tereqqiy qilishini kapaletke ige qilish üchün bésilghan muhim qedem» déyildi.