nato tashqi ishlar ministirliri yighini dawamlashmaqta
shimaliy atlantik ehdi teshkilati we hemrah döletlerning tashqi ishlar ministirliri qatnashqan «ukraina» témiliq yighin bélgiyening paytexti biryussélda dawamlashmaqta.
türkiye awazi radiyosi xewiri: shimaliy atlantik ehdi teshkilati bash katipi stolténbérg, yighinning ikkinchi küni olturushlarning échilish nutiqida, ukraina, giruziye, finlandiye, shiwétsiye, yawropa ittipaqi, awstraliye, yaponiye, jenubiy koréye we yéngi zélandiye tashqi ishlar ministirlirining yighingha qatnashqanliqini éytti.
u, buning rusiyening tajawuzchiliqigha qarshi ittipaqliqning namayendisi ikenlikini qeyt qilghandin kéyin, ukraina tashqi ishlar ministiri dmitri kulébagha salam berdi we uningdin ukrainadiki özgirishler heqqide biwasite melumat élishning nahayiti zor ehmiyetke ige ikenlikini tekitlidi.
axbarat wasitilirigha yépiq halette dawamlishiwatqan shimaliy atlantik ehdi teshkilati tashqi ishlar ministirliri yighini tünügün bashlanghan bolup, ministirlar tünügün kechlik tamaq ziyapitide bir yerge jem bolghanidi.
shimaliy atlantik ehdi teshkilati bash katipi stolténbérg, yighinda, ukrainagha téximu köp yardem bérish, rusiyening tajawuzchiliq heriketlirining netijiliri we moskwa bilen kelgüside qurulidighan diplomatik munasiwetler heqqide muzakire élip bérilidighanliqini bildürgenidi.
u yene, yighinda, iyun éyida ispaniyening paytexti madridta chaqirilidighan bashliqlar yighinigha qeder, shimaliy atlantik ehdi teshkilatining kéyinki «istiratégiyelik uqum» ini tereqqiy qildurush paaliyetliri heqqide muhakime élip baridighanliqlirinimu sözlirige ilawe qilghanidi.
