baydin: amérika erkinliki üchün jeng qilghan ukrainani dawamliq qollaydu
amérika pirézidénti jo baydin ukraina paytexti kiyéw etrapigha jaylashqan bucha shehiride ötküzülgen «urush jinayiti» ikenlikini, xelqaraliq jemiyetning jawabkarlardin buning hésabini sorishi kéreklikini tekitlidi.
türkiye awazi radiyosi xewiri: amérika pirézidénti jo baydin washingtondiki bir méhmansarayda yerlik soda uyushmisining wekillirige xitab qilip sözligen nutuqida, ukraina weziyiti üstide toxtaldi.
u keng kölemlik «wehshiylik» ning yüz bergenliki toghrisidiki xewerlerge ishare qilip, mundaq dédi:
«buchada qolliri arqidin baghlinip, köpinchisi arqa tereptin étip öltürülgen kishilerning jesetlirining kochilargha tashlap qoyulghanliqini körsitidighan fotograflarni körgen bolushunglar mumkin. puqralar qirghin qilindi, jesetliri kolléktip mazarliqlargha kömüldi. bu kechürgili bolmaydighan ghaljirliqni hemmimiz körduq. bu yerde yüz bergenler urush jinayitidin bashqa nerse emes. mesuliyet tuyghusigha ige döletler bir yerge kélip, bularning jawabkarliridin hésab sorishi kérek.»
pirézidént jo baydin amérika we ittipaqdashlirining rusiyege qarshi yürgüzülüwatqan iqtisadiy émbargolarni éghirlashturushni dawamlashturuwatqanliqini bildürüp, rusiye iqtisadining hazirdin bashlapla ghayet zor chiqimlargha uchrighanliqini eskertti.
u rusiyening 24-féwralda (2022) urush bashlighan waqittiki meqsitige yételmigenlikini tekitlep: «rusiye ukraina paytexti kiyéwni qolgha chüshürüshni, démokratiyeni we xelq teripidin saylanghan hökümetni aghdurushni arzu qilatti. emma, kiyéw hazirghiche özini saqlap turuwatidu, hökümetmu wezipisini ada qiliwatidu» dédi.
u bularning hemmisi shundaq bolsimu, urushning axirlishishidin yiraq ikenlikini eskertip: «bu urush uzun dawamlishidu. biraq, amérika özining erkinliki üchün jeng qilghan ukraina xelqni qollashni dawamlashturidu» dédi.
ukraina paytexti kiyéw etrapigha jaylashqan bucha shehirini 1-aprél (2022) rusiye armiyesidin azad qilghan ukraina armiyesini, kochiliri jesetlerge tolgha bir sheher qarshi alghan idi.
kiyéw etrapidin azad qilinghan turalghu rayonlirida 410 puqraning jesiti tépilghan idi.
rusiye puqralarning öltürülgenlikige munasiwetlik eyibleshlerni ret qildi. emma, süniy hemrah shirkiti maksar teripidin 19-mart (2022) tarqitilghan süniy hemrah fotograflirida kochilarda jesetlerning barliqi ilgiri sürülgen idi.
amérika hökümiti mezkur weqedin kéyin, putinni «urush jinayetchisi» dep atidi we tünügün (6-aprél) rusiyege yéngidin yürgüzülidighan émbargolarni élan qildi.
